УИХ дахь “Шударга ёс” эвслийн бүлэг өчигдөр хуралдлаа. Тэд Засгийн газраас өргөн мэдүүлсэн Цагдаагийн албаны тухай, Мөрдөх албаны тухай зэрэг багц хуулийн талаар ярилцсан байна. Эдгээр хуулийг нухацтай авч үзэх ёстой гэж үзсэн учир УИХ-ын гишүүн Ц.Оюунбаатараар ахлуулсан ажлын хэсэг ажиллуулахаар  болсон аж. Түүнчлэн Улс төрийн намуудын тухай  хуульд өөрчлөлт оруулахаар болоод байгаа. Тус хуульд намуудын санхүүжилтийг улсын төсвөөс парламентад авсан суудлынх нь тоогоор олгодог байх ёстой гэж тэд үзэж буй. Ерөнхий сайдыг огцруулах эсэхэд тус бүлгээс хараахан шийдвэрээ гаргаж амжаагүй гэнэ. Энэ талаар тус бүлгийн дарга Н.Батцэрэг “МАН-ын гишүүдийн огцруулах үндэслэл хэр бодитой байсан талаар ярилцлаа. Бид тэдний үндэслэлийг ор үндэсгүй, улстөржүүлсэн зүйл гэж бодохгүй байна. Тиймээс нухацтай хандах ёстой. Мөн хоёр намын удирдах байгууллага өнөө орой /өчигдөр/ хуралдаж, байр сууриа гаргах нь зүйтэй гэж үзлээ. Энэ асуудлаар өнөөдөр олон нийтэд мэдээлнэ” гэв.  Дашрамд, Засгийн газрыг огцруулах тухай бичигт зургаан асуудлыг тусгасан байжээ. Үндэслэл тус бүрээр нь тэд тайлбар гаргах аж.