Сонгинохайрхан дүүргийн гадна цугласан иргэдийн жагсаал улам ширүүсч, хүний тоо нэмэгдэж байна. Сонгуулийн тойргийн хороо хуралдаж, МАН-аас нэр дэвшиж ялалт байгуулсан Д.Сумъяабазарт УИХ-ын гишүүний түр үнэмлэхийг гардуулав. Гэсэн ч Тойргийн хорооноос гаргасан шийдвэр тус тойргийн хорооны Нарийн бичгийн дарга, нийслэлийн Өмчийн харилцааны газрын дэд дарга Ц.Батдорж гарын үсэг зурж, тамга дарж баталгаажуулаагүй байна. Түүний хувьд намаас шийдвэр өгөөгүй байна гэсэн шалтгаанаар тамга дарахгүй байна гэдгийг албаны хүмүүс хэлж байна. Иргэдийн хувьд Тойргийн хорооны нарийн бичгийн дарга Ц.Батдоржийг тамгаа дарахыг шаардаж байна. Тамга дарахгүй бол гаргахгүй гэж дүүргийн Тамгын газрын байрны үүдийг бүчсэн байдалтай байна.
Мөн жагсагчид, “Ерөнхийлөгчөө арчаагүй зөвлөхөө зайлуул”, “Иргэдийн сонголтыг баталгаажуул” гээн уриа лоозон барьж, чанга яригчаар хашгирч байна. Жагсаалд УИХ дахь МАН-ын бүлгийн дэд дарга, УИХ-ын гишүүн С.Бямбацогт, А.Тлейхан, Нийслэлийн ИТХ-ын МАН-ын бүлгийн ахлагч Д.Амарбаясгалан, Раднаасэд нар ирсэн байна. Одоо тэдний араас УИХ дахь МАН-ын бүлгийн гишүүд очиж яваа аж.