УИХ-ын гишүүн Д.Хаянхярваа 2012 оны сонгуулиар Дархан-Уул аймагт ахмадад олгох 330 мянган төгрөгийг тараасан. Үүнийг албан тушаалаа урвуулан ашигласан байж болзошгүй гэж үзэн АТГ-аас шалгаж эхэлсэн ч хэргийг Мөрдөн байцаах газар, “Сонгогчын саналыг худалдаж авах зорилгоор 330 мянган төгрөг тараасан байж болзошгүй. Сонгуулийн тухай хуулийг зөрчсөн байж магадгүй” гэж үзэж байгаа гэдгийг албаныхан хэлсэн. Гэтэл УИХ-ын гишүүн Д.Хаянхярваа УИХ-ын чуулганы хуралдаан дээр хэвлэлийнхэнд гомдож байгаагаа хэллээ. Тэрээр, “Хэвлэлийнхэн арай дэндэж байна. Намайг шалгаж байна гэж бүтэн жил зарлалаа. Өчигдөр 25 дугаар суваг телевизээр шалгаж байна гээд арав, хорин минут ярилаа. Би хууль зөрчөөгүй. Төсвийн хуулийг хэрэгжүүлж ажилласныхаа төлөө хууль зөрчсөн гэж байгаа бол би хариуцлага хүлээхэд бэлэн байна. Тэмүүжин сайд аа, та цагдаагийнхандаа хэл. Гэрт нь нэгжлэг хийх гэхээр зугтаад байна гэж хэлж байна. Би цагдаагийнхны ажлыг хүндэтгэж цаг тухайд нь мэдүүлгээ өгдөг. Шалгах шаардлагатай бол манай гэрт нэгжлэг хий” хэмээн бухимдав.