Оюу толгой ордод 6709А тоот тусгай зөвшөөрөл эзэмшигчийн байгаль орчныг хамгаалах төлөвлөгөө, орчны хяналт шинжилгээний хөтөлбөрийн биелэлт 2012 тайлангаа гаргажээ.  Энэ тайландаа техникийн болон биологийн нөхөн сэргээлтээс эхлээд ус, хөрс, ан амьтан хамгаалах талаар тусгасан байна. Мөн Оюу Толгой уурхайн ус ашиглалтын тухай ч өгүүлжээ.  Тухайлбал, тус компани 2003-2007 онд уурхайгаас 70 орчим км-ийн зайд Гүний хоолой хэмээх усны эх үүсвэрийг олж илрүүлсэн юм.
Ингээд  Монгол Улсын Засгийн газраас Гүний хоолойн  усны нийт нөөцийн 20 хувийг 40 жилийн хугацаанд ашиглах зөвшөөрөл авсан ажээ. Үүнээс гадна  өмнийн говийн ард иргэдэд ундны усны эх үүсвэр хайж  байгаа болон Ханбогд сумын төсөвт усны төлбөрт хэчнээн сая төгрөг төвлөрүүлсэн талаар өгүүлсэн байна.