УИХ дахь Ардчилсан намын бүлэг ээлжит хуралдаанаа хийжээ. Хуралдаанаар энэ хавар хийх томоохон  бүтээн байгуулалтын ажлын талаарх Засгийн газрын  мэдээллийг сонссон байна. Юуны түрүүнд “Чалко” компанитай хийсэн гэрээтэй холбоотойгоор нүүрс олборлох ажил зогссон байсан асуудлыг шийдэж, өнөөдрөөс “Эрдэнэс Тавантолгой” компани “Чалко” компанид нүүрсээ нийлүүлж эхэлснийг зөв алхам хэмээн дүгнэжээ. Тавантолгойгоос нүүрсээ тээвэрлэхэд хоёр дамжлага дамжуулж тээдэг байсныг нэг болгож, шууд эцсийн цэг дээр хүргэхээр болсон. Хоёрдугаарт, нүүрс олборлолт, борлуулалтыг тодорхой хэмжээгээр бууруулах, гуравт, үр ашиггүй зардлыг бууруулах чиглэлээр арга хэмжээ авч эхэлжээ. Нөгөөтэйгүүр, нөхцөл байдал амаргүй хэдий ч нүүрсний борлуулалт эхэлснээр энэ салбарт тодорхой хэмжээгээр итгэл авчирч эдийн засгийн сэргэлтэд тодорхой хэмжээгээр нөлөөлнө хэмээн бүлгийн гишүүд үзжээ.
Үүнээс гадна ойрын хугацаанд төмөр зам, автозамын бодлогын асуудлаар Засгийн газар Ардчилсан намын бүлэгт байр сууриа илэрхийлэх зайлшгүй шаардлагатай хэмээж олонхийн бүлэг үзсэн байна.
Мөн Хөшигтийн хөндийд барих Улаанбаатар хотын  Олон улсын шинэ нисэх буудлын нэмэлт гэрээ болон ажлын явцын талаар Зам тээврийн сайд А.Гансүхийн мэдээллийг сонсчээ. Саяхан манай улсад айлчилсан Японы Ерөнхий сайдын айлчлалын үеэр хоёр орны эдийн засгийн хувьд ашигтай ажиллахаар хэлэлцээр хийжээ. Хоёр талын 2006 онд байгуулсан Хөшигтийн хөндийд Олон улсын нисэх буудал барих тухай гэрээ өнөөг хүртэл хэрэгжихгүй байгаад дүгнэлт хийж, 19,6 тэрбум Иенийн нэмэлт хөрөнгө оруулалтыг Япон улсын тал оруулах болсныг А.Гансүх сайд танилцуулжээ. Үүнийг бүлгийн гишүүд зөв шийдвэр гэж дэмжсэн байна. Тиймээс ирэх сарын 1-нээс уг ажлыг эхлүүлэхийг Зам тээврийн сайд А.Гансүхэд үүрэг болгосон байна.
Мөн бүлгийн хурлаар ярьсан нэг зүйл бол “Чингис” бондын санхүүжилтээр хэрэгжүүлэх ажлын жагсаалтуудтай танилцаж, энэ долоо хоногоос эхлэн эхний санхүүжилтээ хийх нь зүйтэй гэж үзжээ.
Хуралдааны төгсгөлд Ерөнхийлөгчийн сонгууль болох гэж байгаатай холбогдуулан Ерөнхийлөгчид нэр  дэвшигчийг тодруулах ҮЗХ-ны хурлаа Ардчилсан нам ирэх сарын эхний 10 хоногт багтаан хийхээр тогтжээ.