УИХ дахь МАН-ын бүлэг өчигдөр хуралдаж гурван асуудлыг судлах ажлын хэсэг байгууллаа. Тэд Ерөнхий сайдыг огцруулах эсэх асуудлыг хэлэлцэх явцад гарсан зарим тоо баримтыг нягтлах шаардлагатай гэж үзэн парламентад суудалтай улс төрийн намуудын төлөөллийг багтаасан ажлын хэсэг байгуулахыг хүссэн албан бичгийг өнгөрсөн пүрэв гарагт хууль тогтоох байгууллагын даргад өгчээ. УИХ-ын даргын зөвлөлөөр уг асуудлыг хэлэлцээд ажлын хэсэг байгуулахаас татгалзсан байна. Тиймээс МАН-ын бүлэг уг ажлын хэсгийг есөн гишүүний бүрэлдэхүүнтэй байгуулахаар болсноо сэтгүүлчдэд мэдээлэв. Ажлын хэсэг Засгийн газрын бүтэц, бүрэлдэхүүн данхайж буйн учир, төрийн албан хаагчидтай холбоотой тоо баримтын зөрүүг нягтлах, хоёрдугаарт, Монгол Улсын алтны нөөц огцом нэмэгдсэн шалтгаан, “Чингис” бондын хөрөнгөөр алт худалдаж авсан эсэх, гуравдугаарт, Ерөнхий сайд Н.Алтанхуягийн хамаатны дүүгийн гэх “Gobi Power” компани Тавантолгойн нүүрсийг тээвэрлэх тендерт шалгарсан тухай мэдээллийг шалгах аж. Тэд гурав хоногийн хугацаанд дээрх асуудлуудыг судалж, ирэх лхагва гарагт тус бүлгийн хурал дахин хуралдаж, уг асуудлын талаар ярилцах юм байна.
Мөн энэ долоо хоногт хэлэлцэх УИХ, УИХ-ын дэгийн тухай хуультай холбоотойгоор байнгын хороодод МАН-ын бүлгийн гишүүдийн тэгш оролцоог хангахыг урьдын адил шаардаж ажиллана гэдгээ тэд хэлж байв. Энэ талаар УИХ-ын гишүүн Д.Оюунхорол “Сүүлийн 20 гаруй жил УИХ-ын гишүүд адил тэнцүү эрхтэйгээр байнгын хороодод хуваарилагдан ажилласаар ирсэн. Гэтэл парламент ардчиллын үнэт зүйлсээсээ ухарсан алхам хийж, өнөөгийн байдлаар МАН-ын бүлгийн ганц ч гишүүн Ёс зүйн дэд хороонд харьяалагдахгүй байна. Парламент засаглалтай аль ч улс орон байнгын хороогоор дамжуулан дуу хоолойгоо хүргэдэг. АОХН-ийн орнуудын хурал болохоос өмнө бид энэ ойлголцохгүй байгаа асуудлаа нэг мөр шийдэх ёстой” гэв.