УИХ-ын дэд дарга С.Баярцогтод ямар хариуцлага ноогдуулах эсэхийг өнөөдөр Ёс зүйн дэд хороогоор хэлэлцэнэ. Өмнө нь, чуулганы нэгдсэн хуралдаанаар УИХ-ын дэд даргаас чөлөөлөгдөх түүний хүсэлтийг хэлэлцсэн ч “Шударга ёс” эвслийн бүлэг завсарлага авсан. Тэдний завсарлага авах шалтгаан нь юу байв гэдэг нь эргэлзээтэй байгаа юм. Магадгүй С.Баярцогтод ёс зүйн хариуцлага нэрээр УИХ-ын дэд даргаас чөлөөлөх хариуцлага биш гэж үзсэн байж болох юм. Тэгэхээр эвслийн бүлгийн гишүүдийн туйлын хүсэл бол С.Баярцогтыг УИХ-ын гишүүний бүрэн эрхээс нь түдгэлзүүлэх. Тиймдээ ч тэд энэ асуудлыг нэн түрүүнд Ёс зүйн дэд хороогоор хэлэлцэх ёстой гэж үзсэн байх. Ёс зүйн дэд хороогоор хэлэлцээд УИХ-ын дэд даргаас чөлөөлөгдөх нь ёс зүйн хариуцлага биш гэж үзвэл УИХ-ын гишүүний бүрэн эрхийн тухай ярих болно.
Чуулганы хуралдаанаар түүний гаргасан өргөдлийг хэлэлцэж ёсчлон биелүүлсэн бол С.Баярцогт УИХ-ын гишүүн гэдэг сэтэртэйгээ үлдэх байлаа. Нэг ёсондоо халдашгүй дархан эрхтэй үлдэх байсан. Харин “Шударга ёс” эвслийн бүлгийн завсарлага авсан нь С.Баярцогтод хүнд цохилт болж байж магадгүй юм. Яагаад гэвэл Ёс зүйн дэд хороогоор асуудлыг хэлэлцээд дэд даргаас бус гишүүний бүрэн эрхээс түдгэлзүүлэх ёстой гэсэн шийдвэр гаргаад түүнийг нь УИХ-аар хэлэлцүүлбэл С.Баярцогтын эсрэг олонх нь кноп дарна. Ардчилсан нам олонхиороо хамгаалаад ч барахгүй. Учир нь, МАН-ын гишүүд, “Шударга ёс” эвслийн бүлэг, бие даагч гишүүд гээд олонхи нь С.Баярцогтыг эсэргүүцнэ. Дээрээс нь Ардчилсан намаас Ж.Батзандан мэтийн нөхдүүд С.Баярцогттонгуудыг улс төрөөс зайлуулах гэж ирсэн гэдгээ хэлсэн. Тэгэхээр С.Баяцогтын хувь заяа хэцүүднэ.
Гишүүний бүрэн эрхийг нь түдгэлзүүллээ гэж төсөөлөхөд түүнд Эрүүгийн хэрэг үүсгээд шалгаад эхэлж ч мэдэх юм. Нууц дансанд байршуулсан нэг сая ам.долларыг Оюутолгойн гэрээг байгуулах үед авсан байж болзошгүй, эх орондоо татвар төлөөгүй гэх мэтээр буруутгах шалтгаан мундахгүй байж мэднэ.
Гэхдээ түүнд хуулийн хамгаалалт байгаа гэдгийг Хууль зүйн сайд Х.Тэмүүжин хэлсэн. Хувийн ашиг сонирхлын зөрчлийн тухай хуулиар УИХ-ын гишүүний бүрэн эрхийг түдгэлзүүлэх, эргүүлэн татах тухай хэд хэдэн заалт байсныг өмнөх парламентын үед УИХ-ын гишүүн Ө.Энхтүвшингийн захиалгаар УИХ-ын гишүүн Ц.Мөнх-Оргил хуулийн ажлын хэсгийг ахалж байхдаа хүчингүй болгосон. Ингээд ганц заалт үлдээсэн нь, “УИХ-ын гишүүн хүн гэмт хэрэг үлдээд, үйлдэл дээрээ баригдвал эргүүлэн татна” гэх утгатай ганцхан заалт үлдсэн. Бүр тодорхой хэлбэл,  УИХ-ын гишүүн хүн хутгалчихаад хутгаа барьсан чигтээ баригдвал үг өчиггүй бүрэн эрх нь түдгэлзэнэ гэсэн үг. Гэтэл С.Баярцогт бол үйлдэл дээрээ баригдсан “гэмт хэрэгтэн” биш. Оффшир дансанд байршсан нэг сая ам.долларын эх үүсвэр нь хаанаас эхтэй, юунд зарцуулсан эсэх нь ч тодорхойгүй байгаа. Бараг илрэх боломжгүй. Учир нь, оффшир дансны гол давуу тал нь нууцыг гадагш нь өгдөггүй.
Тэгэхээр С.Баярцогтын хувьд асуудал хүндрэх магадлалтай ч хуулийн заалтыг сөрөг хүчин олонх байх үедээ устгасан болохоор хонгилын үзүүрт гэрэл ёлтойж мэдэх юм.
Гэхдээ С.Дэмбэрэл гишүүний хэлсэн үгийг санах хэрэгтэй. Тэрээр, “Улс төрд жудаг гэж байдаггүй юм. Харин хувь хүний жудаг байх ёстой. С.Баярцогтын аав, ээж нь өвчтэй зовлонтой байхад бид ингэж шахаж, хавчиж болохгүй. Би таныг өмгөөлөхгүй, бас буруугүй гэж хэлж чадахгүй. Хэрэв албан тушаалаас чинь бууруулах болбол би хамгаалахгүй” гэж хэлсэн. Хэдийгээр С.Баярцогтыг хамгаалсан янзтай үг хэлсэн ч гэлээ цаагуураа С.Баярцогтод хандаж, хувь хүний ёс жудаг байх ёстой шүү гэдгийг сануулсан хэрэг.
Тэгвэл иргэд С.Баярцогтын тухайд ямар бодолтой байгааг нэгэн судалгаанаас харъя. Манай сайт С.Баярцогтыг хэвлэлийнхэнд хандаж мэдээлэл хийсний дараа энэхүү судалгааг олон нийтийн дунд явуулсан юм. “Офф-шир бүсэд нууц данстай УИХ-ын дэд дарга С.Баярцогтод ямар хариуцлага тооцох вэ?” гэсэн санал асуулга явуулахад судалгаанд оролцогсдын 66.5 хувь нь УИХ-ын гишүүний бүрэн эрхээс нь түдгэлзүүлэх хэрэгтэй гэдэг санал өгсөн байна. Харин УИХ-ын дэд даргаас нь чөлөөлөх гэдэг хариултад судалгаанд оролцогсдын 25.5 хувь нь санал өгсөн бол, ямар хариуцлага тооцох эсэх нь УИХ-ын бүрэн эрхийн асуудал гэж таван хувь нь хариулжээ. Харин С.Баярцогтын өмгөөлж, “Хүн хөрөнгөө мартаа л биз” гэж гурван хувь нь хариулсан байна. Иргэд бол ийм бодолтой байна. Тэгэхээр одоо Ёс зүйн дэд хороо ямар шийдвэр гаргахыг л хүлээх үлдлээ. Нэг хачирхалтай нь Ёс зүйн дэд хороонд сөрөг хүчнээс нэг ч гишүүн байхгүй гэдгийг энд онцлон сануулъя.