Цахим улс төр номын зохиогчид ингэж дүгнэв. Анх цахим ертөнцийнхөн телевиз сонингоос мэдээллээ цуглуулдаг байсан бол одоо эсэргээрээ тэд цахим ертөнцөөс мэдээллээ цуглуулдаг болжээ. Түүнчлэн зохиогчид номоо цахим ертөнцөд байршуулдаг байсан бол одоо цахим ертөнцөд өрнөж буй хэлэлцүүлгийг ном болгодог болсон байна. Үүнийг нэг жишээ болох “Цахим улс төр” ном өнөөдөр нээлтээ хийсэн юм. Саяхны хийсэн судалгаагаар манай улсад  Facebook хэрэглэгчдийн тоо 600 мянга хол давсан гэсэн тоо гарчээ. Энэ тоо цаашид эрчимтэй нэмэгдэх хандлага ч ажиглагдсан байна. Харин twitter хэрэглэгчдийн тоо 50 мянга давсан байна. Дээрх хоёр цахим хаягт хандаж буй иргэдийн улс төрийн оролцооны талаарх сонирхолтой баритыг номын зохиогчдын нэг О.Чулуунбилэг энэ үеэр зочдод дуулгасан юм. Түүний хэлж буйгаар Facebook-т ихэвчлэн улс төрийн идэвхгүй нас буюу 18-25 насныхан ханддаг гэнэ. Тэдний сонирхол нь гоё зураг, онигоо, дуу бүжиг болон сонин содон мэдээлэл байдаг байна.  
Харин twitter-т 32-34 насныхан буюу нийгмийн дундаж хэсгийн “том” төлөөлөгчид ханддаг аж. Ингэхдээ тэдэнд нийгэмд болж буй “юм”-наас таалагддаг зүйл ховор байдаг учир тэд бүгд шүүмжлэгчид байдаг аж. Хэдийгээр тэд улс төр болоод нийгмийн бүхий л асуудлыг шүүмжилдэг ч улс төрийн идэвхтэй оролцогчид бөгөөд сонгуульд байнга саналаа өгдөг бүлэг гэнэ.
Хэдийгээр манай улсад цахим ертөнц ид хүчээ авч байгаа ч сонгуулийн үеэр оноо цуглуулах, нэгнийгээ гүтгэн доромжлох хэрэгсэл болгон ашиглахаас өөр аргад шилжиж чадахгүй байгааг номын зонхиогчид хэлж байсан юм. Тиймээс тэд цахим ертөнцийг ашиглан улс төрийн тогтвортой байдал бий болгож, эрх баригч нам 10-20 жилээр тогтвортой үйл ажиллагаа явуулах өнцгийг энэхүү номондоо буулгажээ.