УИХ дахь МАН-ын бүлгийн гишүүд гурван ажлын хэсэг байгуулан Таван толгойн Цагаан хаданд ачих буулгах тендерт ялсан “Говь Повер” ХХК-ын ялсан 17 тэрбум төгрөгийн будлианы тухай, Бондын мөнгийг юунд зарцуулж байгаа тухайг судлах ажлын хэсэг байгуулсан тухай мэдэгдэж байсан. Тэгвэл ажлын хэсгийнхэн ажлаа дуусгажээ.
Ажлын хэсгийнхний мэдээллэснээр Тавантолгой компанийн тендэрт “Говь повер” компани оролцож, ялсан гэх мэдээлэл үнэн болохыг тогтоожээ. Тендэрт ялсан тус компанийн захирал Ч.Уянга нь Засгийн газрын хэрэг эрхлэх газрын дэд дарга Г.Дэнзэнгийн гэргий, Ерөнхий сайд Н.Алтанхуягийн дүүгийнх нь төрсөн охин аж.  Харин Г.Дэнзэн нь Засгийн газрын хэрэг эрхлэх газрын дэд даргын алба хашихын зэрэгцээ “Эрдэнэс тавантолгой” компанийн ТУЗ-ийн даргаар ажилладаг аж.
“Говь повер” компанийн хувьд Тавантолгойн тендэрт оролцохоос өмнө компанийн өөрийнх нь үнэлгээ нэг сая төгрөг байсныг Ч.Уянга худалдан авч, нэг өдрийн дотор бичиг баримтыг нь өөрчлөн, нэг тэрбум төгрөгийн үнэтэй болгож, тендэрт оролцоод долоо хоногийн дараа 17.7 тэрбум төгрөгийн үнэтэй тендэрийг авсан гэж МАН-ын гишүүд хэллээ. Энэ асуудлыг МАН-ын гишүүд ил болгохоор тендерээ цуцалсан нь мөн тогтогдсон гэж тэд хэлж байна.
Ийн Ерөнхий сайдын хамаатан садан нь Тавантолгойн тендерт ялсан нь Н.Алтанхуягийг огцруулах том шалтгаан болно. Тиймээс түүнийг огцруулах асуудлыг дахин тавина гэлээ.

"Говь повер" компанийн захиар Ч.Уянга нь энэ хашаанд амьдардаг юм байна.