Өнөөдөр Монгол улс нь 27-ноос 29-нд Ардчилсан орнуудын хамтын нийгэмлэгийн Сайд нарын VII бага хурлыг зохион байгуулж байгаа юм. Ерөнхий сайд Н.Алтанхуяг нээлтийн үг хэлснээр АОХН-ийн VII бага хурал эхэлсэн энэ хуралд дэлхийн 104 орны 1215 төлөөлөгч оролцохоор бүртгүүлсэн байна.

Улаанбаатар хотод 2003 онд Ардчилалыг шинээр болон сэргээн тогтоосон орнуудын олон улсын бага хурлыг 500 орчим төлөөлөгчтэйгөөр хийж байснаас өөр ийм олон хүн оролцсон том арга хэмжээ зохион байгуулсан туршлага манай оронд  байхгүй. Монголд анх удаа ийм өндөр хэмжээний хурал болж байгаа нь Монгол Улсын нэр хүндийг дэлхийн тавцанд өргөх, ардчиллын суурь зарчим, ирээдүйн хөгжилд үнэтэй хувь нэмэр оруулах ач холбогдолтой аж. Гадаадын хэвлэл мэдээллийн 50 гаруй байгууллагын төлөөлөл, Монголын 200 гаруй сэтгүүлч уг үйл ажиллагааг сурвалжлахаар болж байгаа юм.