УИХ-ын Төрийн байгуулалтын байнгын хороо хуралдаж УИХ-ын дэд даргыг сонгох тухай асуудлыг хэлэлцлээ. УИХ-ын дэд дарга С.Баярцогт Швейцарь дахь нууц дансны асуудлаасаа болж өөрийн хүсэлтээр үүрэгт ажлаасаа чөлөөлөгдөх хүсэлт гаргаж үүнийг нь УИХ ёсчлон биелүүлсэн. Ингэснээр УИХ дахь АН бүлгээс дахин УИХ дэд дарга томилох болоод байсан юм. Үүний дагуу тус намын бүлгээс УИХ-ын гишүүн Р.Гончигдоржийг дэд даргад томилуулах хүсэлт гаргасан юм. Үүнийг бүлгийн дарга Д.Эрдэнэбат байнгын хорооны хуралдаанд танилцуулсан юм. Дэд даргад нэр дэвшигчээс асуух асуулт байнгын хорооны гишүүдээс гарсангүй. Ийн санал хурааж УИХ-ын гишүүн Р.Гончигдоржийг УИХ-ын дэд даргад нэр дэвшүүлэх Байнгын хорооны санал дүгнэлтийг чуулганы нэгдсэн хуралдаанд танилцуулахаар тогтлоо.
УИХ-ын гишүүн Р.Гончигдоржийн хувьд 1975 оноос Монгол Улсын их сургуулийн багшаас ажлын гараагаа эхлүүлж, улмаар 1990-1992 онд Улсын Бага Хурлын гишүүн, 1992 оноос хойш Монгол Улсын Их Хурлын гишүүнээр нийтдээ 6 удаа сонгогджээ. Мөн 1990-1992 онд Монгол Улсын Дэд Ерөнхийлөгч, Улсын Бага Хурлын дарга, 1996-2000 онд Улсын Их Хурлын дарга зэрэг төрийн өндөр албанд олон удаа сонгогдож ажилласан төрийн ажлын арвин туршлагатай, өндөр мэдлэг чадвартай парламентч юм. Дашрамд дурьдахад, С.Баярцогт, Р.Гончигдорж хоёр чуулганы танхимд нэг ширээнд суудаг юм. Тэгэхээр Р.Гончигдорж УИХ-ын дэд дарга болсоноор С.Баярцогттой суудлаа сольж суух бололтой.