МАН-аас Ерөнхийлөгчийн сонгуульд нэр дэвших эрх аваад байгаа УИХ-ын гишүүн Б.Бат-Эрдэнийг тус намын удирдах зөвлөл дэмжиж ажиллана гэдгээ мэдэгдэж өнөөдөн санамж бичигт гарын үсэг зурлаа. Энэхүү гэрээний утга учир юу болохыг МАН-ын дарга Ө.Энхтүвшин танилцуулсан юм. Тэрээр “Монгол Улсын Ерөнхийлөгчийн сонгууль явагдахтай холбогдуулан Үндсэн хууль, Ерөнхийлөгчийн сонгуулийн тухай хууль, бусад хууль тогтоомжуудын хүрээнд хэрэгжүүлж, намын дүрмийн дагуу нэр дэвшигчийг дэмжиж ажиллах нь энэхүү гэрээний үндсэн агуулга юм. Намын Удирдах зөвлөл энэ гэрээнд зааснаар  нэр дэвшигчийнхээ сонгуулийн үйл ажиллагааг нэгдсэн удирдлагаар хангана. Нэр дэвшигчийн сонгуулийн сурталчилгааны санхүүжилтийг хуульд зааснаар гаргаж, хамтран ажиллана. Намын бага хурал болон УИХ-ын гишүүдийг аймаг нийслэлд ажиллуулна. Нэр дэвшигчийн алдар хүндийг гутаах, гүтгэн доромжилсон бол хуулийн дагуу хамгаалж ажиллана” гэлээ.
Нэр дэвшигчийн хүлээх үүрэгт, “Сонгуулийн хугацаанд Монгол Улсын хууль тогтоомж МАН-ын дүрмийн хүрээнд үйл ажиллагаа явуулна.МАН сонгуулийн төв штаб болон аймаг нийслэл сум дүүргийн сонгуулийн штабтай нягт хамтран ажиллана, төв штабаас гадна ганцаарчилсан үйл ажиллагаа явуулахгүй. Шударга ёс, эв нэгдлийг илэрхийлэгч байна” гэж заажээ. Дээрх зүйлүүдийг намын удирдах зөвлөл болон нэр дэвшигч хоёр тал үүрэг болгон хүлээж гарын үсэг зурав.
Ерөнхийлөгчийн сонгуульд нэр дэвшигч Б.Бат-Эрдэнэ, “МАН-тай хамтран ажиллах гарын үсэг зурлаа. Энэхүү итгэлцэл, хариуцлага, хамтын ажиллагааны гэрээг чанд сахиж, намайг дэмжиж сэтгэл зүрхээ хамтран зүтгэж байгаа нөхдөд талархаж байна. Ерөнхийлөгчийн сонгуульд миний нэрийг дэвшүүлж, итгэл, хариуцлага хүлээлгэж байгаад баярлаж байна. Миний бие энэ сонгуульд шударга ёсыг дээд зэргээр эрхэмлэж, хууль ёсыг чанд сахиж, энэ өрсөлдөөнд харгүйгээр ажиллах болно. Надтай өрсөлдөх хүмүүс маань улс төрийн соёлтой, шударгаар өрсөлдөх байх. Хэрэв энэ сонгуульд намайг сонговол эх орныхоо төлөө, газар нутгийн бүрэн бүтэн байдлын төлөө, ард түмнийхээ төлөө зүтгэж чармайж ажиллах болно” гэлээ.