УИХ-ын нэгдсэн чуулганы хуралдаанаар УИХ-ын дэд даргыг сонгох тухай асуудлыг хэлэлцэж байна. Хэлэлцэх асуудлыг хэлэлцэхийн өмнө МАН-ын бүлгийн дарга Н.Энхболд  УИХ-ын сонгуулийн 26 дугаар тойрогт нэр дэвшин өрсөлдсөн Д.Сумъябазарын УИХ-ын гишүүний тангаргыг өргүүлэх асуудлыг хэлэлцэн шийдвэрлэх хүсэлтэй байгаагаа илэрхийлсэн юм.  
Харин УИХ дахь Ардчилсан намын бүлгийн дарга Д.Эрдэнэбат “Дахин сонгууль одоо хэрэгжиж байгаа хуулийг зөрчсөн гэж үзсэн байр суурь дээр Ардчилсан намын бүлэг одоо хүртэл хэвээр байгаа”хэмээн байр  сууриа илэрхийлэв.
 УИХ-ын 26 дугаар тойргийн хорооны дахин  санал хураалтын хувьд  22.00 цагт дуусах байсан ч 20.00 цагт хаах тухай шийдвэрийг тус тойргийн хорооны дарга М.Баасандорж гуравдугаар сарын 28-ны өдрийн тогтоолоор гаргасан байсан юм. Гэтэл өнгөрсөн онд Баянзүрх дүүргийн дахин санал хураалтыг Орон нутгийн сонгуультай давхцуулан нэг өдөр зохион байгуулах болсонтой холбогдуулан 2012 оны арваннэгдүгээр сарын 1-нд УИХ-аас тогтоол гаргаж дахин санал хураалт дуусах хугацааг 20.00 байсныг 22.00 цаг болгож өөрчилсөн.