Монгол Улсын Ерөнхийлөгчийн санаачилгаар "Шүүх эрх мэдлийн шинэтгэл ба шударга ёс" үндэсний чуулганы үргэлжлэл болгож "Хуулийн засаглал ба Шударга ёс" үндэсний хоёрдугаар чуулганыг энэ сарын 17-нд Төрийн ордонд зохион байгуулахаар болжээ. Чуулганыг Ерөнхийлөгчийн тамгын газар, Хууль зүйн яам, Шүүхийн ерөнхийлөл, Боловсрол, шинжлэх ухааны яам хамтран зохион байгуулж байгаа юм.
Чуулганы талаар Ерөнхийлөгчийн хуулийн зөвлөх Ч.Өнөрбаяр мэдээлэл өгсөн юм. Тэрээр, "Чуулганаар Шүүх эрх мэдлийн шинэтгэл, шүүхийн багц хуулийн хэрэгжилт, шүүхийн захиргааны өөрчлөлт, цаашдын чиг хандлагын талаар, Эрүүгийн хуулийн шинэтгэл, боловсруулж буй хуулийн төслүүдийн танилцуулга, Авилгатай тэмцэх зорилгоор хэрэгжүүлсэн үйл ажиллагааны тайлан тус үйл ажиллагааг эрчимжүүлэх, авлигаас урьдчилан сэргийлэх арга зам, авилгатай тэмцэх үндэсний стратегийн төслийн танилцуулга, Иргэдэд эрх зүй, улс төр, эдийн засгийн суурь үндсэн боловсролыг олгож, хууль дээдэлдэг, шударга иргэдийг хэрхэн бэлтгэх талаар хэлэлцүүлэх юм" гэлээ.
"Хуулийн засаглал ба шударга ёс" үндэсний чуулганы үндсэн зорилго нь тус салбаруудад цаашид хийх арга хэмжээг салбаруудын төлөөлөл, шүүх, хууль сахиулах байгууллагууд, иргэний нийгмийн байгууллагын төлөөллийг хамтаар тодорхойлж, нэгдсэн шийдэлд хүрэх аж.
Энэхүү чуулганд өөрийн дуу хоолойгоо хүргэх, үгээ хэлэхийг хүсвэл irgen@president.mn гэсэн цахим хуудсаар хандаж болох юм байна.

Г.Даваа