Монгол Улсын Ерөнхийлөгчийн 2013 оны сонгуульд АН-аас нэр дэвшигч Ц.Элбэгдоржийг дэмжин оролцоохоо мэдэгдээд буй ИЗНН, МҮАН-тай Ардчилсан нам хамтын ажиллагааны гэрээ байгууллаа. Гэрээ байгуулахад Ардчилсан намын дарга Н.Алтанхуяг, ерөнхий нарийн бичгийн дарга Ц.Оюундарь, ИЗНН-ын дарга С.Оюун, МҮАН-ын дарга М.Энхсайхан, дэд дарга Н.Батцэрэг, УИХ-ын зарим гишүүн Засгийн газрын гишүүд, намын удирдах ажилтнууд байлцлаа.
Ёслолын ажиллагааг Ерөнхий сайд, Ардчилсан намын дарга Н.Алтанхуяг нээж “Өнөөдөр түүхэн сайхан үйл явдал болж байна. Монгол Улсын Ерөнхийлөгчийн 2013 оны сонгуульд Ардчилсан намаас нэр дэвшээд байгаа Ц.Элбэгдоржийг ИЗНН, МҮАН нэгэн санаагаар хамтарч дэмжье хэмээн шийдэж гарын үсэг зурж байгаад баяртай байна. ИЗНН-ынхандаа их баярлалаа. МҮАН-ынхандаа их баярлалаа. Бүгдээрээ хамтаараа зүтгэж Ардчилсан Ерөнхийлөгчөө сонгуульна гэдэгт эргэлзэхгүй байна” гэлээ.