УИХ-ын гишүүн Ц.Нямдорж Үйлдвэр хөдөө аж ахуйн сайд Х.Баттулгыг гүтгэсэн хэрэгт уначихаад буй. Тэрээр Чингэлтэй дүүргийн шүүхээс гаргасан “Х.Баттулгаас уучлал гуй” гэсэн утгатай шийдвэрийг эсэргүүцэж, Нийслэлийн давж заалдах шатны шүүхэд хандаад байсан юм. Тус шүүх түүний давж заалдах гомдлыг өчигдөр хэлэлцээд анхан шатны шүүхийн шийдвэрийг хэвээр үлдээх магадлал гаргалаа.
УИХ-ын гишүүн Ц.Нямдорж өнгөрсөн оны хавар Х.Баттулгыг Зам тээвэр, барилга хот байгуулалтын сайд байхдаа хууль зөрчиж, төмөр замын нууц гэрээ хийсэн тухай мэдээлэл түгээсэн. Харин Х.Баттулга түүнийг хэвлэл мэдээллийн хэрэгслээр худал мэдээлэл түгээж, нэр төрд нь халдлаа хэмээн шүүхэд хандсан юм. Одоогоор хоёр шатны шүүх Ц.Нямдоржийг буруутайд тооцож, Х.Баттулгаас уучлал гуйх шийдвэр гаргачихаад байна.