Сонгуулийн ерөнхий хороо өчигдөр хуралдаж, Гадаадад байгаа иргэдийн санал авах ажил зохион байгуулах Комиссын мэдээллийг сонслоо. Гадаадад байгаа иргэдийг бүртгэх ажиллагааг  хуулийн дагуу санал авах өдрөөс 15 хоногийн өмнө  буюу лхагва гарагт  дууссан. Одоо Комисс  нийт салбар комиссоос  хүлээн авсан бүртгэлийг нэгтгэж дуусгаад  түүнийг бүртгэлийн асуудал   эрхэлсэн төрийн захиргааны байгууллагад хүргүүлнэ. Урьдчилсан мэдээгээр 6000 гаруй  монгол иргэн оршин суугаа улсад байгаа Монгол Улсын дипломат төлөөлөгчийн газарт биечлэн очиж, шуудан, цахим шуудан, факсаар сонгуульд оролцохоо мэдэгдэж бүртгүүлжээ. Мөн хуралдаанаар  сонгуулийн төв байгууллага  саналын хуудасны загварыг  баталсан байна. Хуульд заасны дагуу саналын хуудас нь нэр дэвшигчийн  гэрэл зурагтай, сонгогч саналаа хэрхэн тэмдэглэх тухай товч заавартай байна. Нэр дэвшигчийн эцэг /эх/-ийн нэрийг жижиг үсгээр, өөрийн нэрийг том үсгээр, түүний ард  нэр дэвшүүлсэн намын нэрийг хаалтад бичиж,  түүнчлэн нэр дэвшигчдийн нэрийг УИХ-д хамгийн олон суудал авсан намын нэр дэвшигчээс эхлэн дараалуулж бичсэн байх аж. Харин харааны бэрхшээлтэй сонгогч саналаа өгөхөд зориулсан саналын хуудсыг уншиж, саналаа тэмдэглэх тусгай зориулалтын барель үсэг бүхий хавтас санал авах байр бүрт нэг байхаар тооцоолжээ.
Түүнчлэн СЕХ-ны хуралдаанаар саналын хуудасны индекс, дугаар, тоог тогтоох тухай, сонгогчийн саналыг зөөврийн битүүмжилсэн саналын хайрцгаар авах журамд өөрчлөлт оруулах тухай зэрэг асуудлыг хэлэлцжээ.