Цагдаагийнхан УИХ-ын гишүүн Ё.Отгон­баярын эхнэр О.Эрдэнэсолонгыг мөнгө угаасан хэрэгт сэжиглэж өнгөрсөн долоо хоногт хорьсон нь дуулиан тариад байна.

УИХ-ын гишүүн Ё.Отгонбаяр “Хууль хяналтынхан эхнэрийг маань хэлмэгдүүллээ. Бидэнд тийм их мөнгө байхгүй. Цагдаагийнхан 300 сая төгрөгийг 300 сая ам.доллар гэж ташаа мэдээлэл түгээж, манай гэр бүлийн нэр хүндэд халдлаа” хэмээн мэдэгдсэн. УИХ дахь МАН-ын бүлгийнхэн Ерөнхийлөгчийн сонгуультай холбоотой манай гишүүдийн нэр хүндэд халдаж, хэлмэгдүүлж байна хэмээн үзэж буйгаа чуулганы танхимд илэрхийлж байв. Ингэснээр хууль хяналтынхан үнэхээр ч эндүүрэв үү гэсэн эргэлзээ олон нийтэд үүссэн.

Харин О.Эрдэнэ­солонгод холбогдох хэргийн талаар Нийс­лэлийн прокурорын газрын орлогч Ц.Батболд мэдээлэл хийж, зарим зүйлд тайлбар хийсэн юм. Түүний хэлснээр О.Эрдэнэсолонгын дансаар нэлээн их хэмжээний үнийн дүнтэй мөнгөн гүйлгээ удаа дараа хийсэн мэдээллийг Эрүүгийн цагдаагийн газрын Эдийн засгийн гэмт хэрэгтэй тэмцэх хэлтсийн ажилтнууд шалгажээ. Ингээд Улсын мөрдөн байцаах газрын Эдийн засгийн гэмт хэрэг мөрдөх хэлтэст шилжүүлж, эрүүгийн хэрэг үүсгэсэн учир Нийслэлийн прокурорын газар хяналт тавьж ажиллаж байгаа гэнэ. Прокурор Ц.Бат­болд О.Эрдэнэсолонгод холбогдох хэргийн мөнгөн дүнтэй холбоотой тодорхой мэдээлэл өгөөгүй ч  түүний дөр­вөн банкин дахь 21 дан­саар их хэмжээний мөнгөн гүйлгээ хийсэн нь хорьж шал­гах үндэслэл болж буйг хэлэв.

Ингээд тэрээр сэтгүүлч­дийн асуултад ингэж хариуллаа.

-О.Эрдэнэсолонгод хол­богдох хэргийн мөнгөн дүнг цагдаагийн байгууллага буруу мэдээлсэн гэж УИХ-ын гишүүн Ё.Отгонбаяр тайлбар хийсэн. Хэ­рэгт хяналт тавьж буй бай­гууллагын хувьд мөнгөн дүнг тодорхой хэлж өгөхгүй юү?
-Мөнгөн дүнгийн талаар хэвлэлээр янз бүрийн тоо бичсэн байна. Гэхдээ шалгавал зохих их хэмжээний мөнгөний гүйлгээ хийсэн учир шалгаж байгаа юм. Голомт, Зоос, Худалдаа хөгжлийн банк, Улаанбаатар хотын банкны 21 дансаар хийсэн гүйлгээнүүд нь ямар эх үүсвэрээр орж ирсэн, хууль ёсных мөн эсэх, ямар зүйлд зарцуулсан, татвар төлсөн эсэхийг нь мөрдөн байцаалтын явцад шалгаж тогтооно. Тиймээс мөнгөн дүнгийн талаар тодорхой мэдээлэл өгөх боломжгүй.

-Энэ хэрэгтэй холбоотой өөр хэн нэгнийг шалгаж байгаа юу?
-Үгүй. О.Эрдэ­нэс­олонгыг л шалгаж байна.

-21 данс нээлгэсэн дөр­вөн банкны холбогдох ажилтнуудыг ч шалгах уу?
-Одоогоор Монголбанкны Сан­хүүгийн мэдээллийн албан дахь мэдээллийг шал­гаж байна. Мэдээж, энэ хэр­гийг шалгахад хугацаа их шаардлагатай.

-УИХ-ын гишүүн Ё.От­гон­­баяр танай байгуул­лагад эхнэртэйгээ уулзах хүсэлтээ ирүүлсэн үү?
-Ё.Отгонбаяр гишүүн ма­найд одоогоор /өнгөрсөн баа­сан гарагт/ эхнэртэйгээ уулзах хүсэлт албан ёсоор ирүүлээгүй.