УИХ-ын чуулганы өнгөрсөн баасан гарагийн үдээс өмнөх хуралдаанаар Гаалийн бо­лон нэмэгдсэн өртгийн ал­бан татвартай холбоотой хууль, УИХ-ын тогтоолыг ба­тал­лаа. Ингэснээр 24-өөс дээш суудалтай, 45-аас дээш зорчигчийн багтаамжтай, үйлдвэрлэснээс хойш нэг хүртэл жилийн доторх шинэ  автобус, троллейбусыг гаалийн болон НӨАТ-аас чөлөөлөх боломж бүрдэв. Мөн газрын тосны бүтээгдэхүүн гарган авах төслийн хүрээнд импортоор оруулж буй технологийн то­ног төхөөрөмж, сэлбэг, тусгай зориулалтын барилгын материал, бүрэн ба хагас боловсруулсан модон эд анги бэлтгэж, төрөл бүрийн модлог хавтан, хуулга зэргийг гаалийн болон НӨАТ-аас чөлөөлөх эрх зүйн зохицуулалттай боллоо.

Харин чуулганы үдээс хойшхи хуралдаанд Ерөнхий сайд Н.Алтанхуяг цаг үеийн асуудлаар мэдээлэл хийсэн юм. Тэрээр улсын хэмжээнд шатахууны үнийг 50 төгрөгөөр бууруулсан, наадамд 50 тэрбум төгрөг төсөвлөөгүй гэдгийг УИХ-ын гишүүдэд мэдэгдсэн. Мөн энэ үеэр Ерөнхий сайдын багцын 50 тэрбум төгрөгийг юунд зарцуулахаа товчхон тайлагнав. Тухайлбал, Архангай, Баянхонгор, Баян-Өлгий, Завхан, Сүхбаатар, Сэлэнгэ, Увс, Хөвсгөл, Хэнтий гэсэн 11 аймагт оношилгооны төв байгуулахад 23 тэрбум, Улаанбаатар хотод Хүүхдийн зүрхний мэс заслын төв байгуулахад 2.4 тэрбум төгрөг зарцуулахаар болжээ. Баруун гурван аймаг буюу Ховд, Увс, Баян-Өлгийд битүү зах барихад зориулж есөн тэрбум төгрөг зарцуулах нь. Найман тэрбум төгрөгөөр залууст чиглэсэнажил хийх юм байна. Тухайлбал, Үндэс­ний цэцэрлэгт хүрээлэнд ду­гуйн, цанын, явган хүний зам тавьж, хөлбөмбөг, саг­сан бөмбөг, теннисний тал­бай цогцоор нь байгуулах аж. Мөн Төв усан бассейн байр­ладаг Нийслэлийн хүүхэд залуучуудын төвийн байрыг засч, янзлах гэнэ.

Хоёр тэрбум төгрөгөөр за­мын цагдаагийнханд тор­гууль бичдэг компьютер, хэв­лэдэг машины хамт авч өгө­хөөр болжээ. Ингэснээр ирэх наймдугаар сараас замын цаг­даа торгууль бичихдээ бэ­лэн мөнгө авдгийг болиулах юм байна. Түүнчлэн төрийн үйлчилгээг авахад иргэдэд их чирэгдэл учирдаг тул автомат машин 120 ширхгийг авч нийслэлд хот болон аймгийн тө­вүүдэд суурилуулна. Эх­ний ээлжийн 19 машиныг удах­гүй Улаанбаатар хотод суурилуулах гэнэ. Эндээс ту­хайн иргэн хурууны хээ бо­лон иргэний үнэмлэхнийхээ тус­ламжтайгаар хорооны то­дорхойлолт зэргийг өөрөө гаргаж авах боломжтой байх аж.  Үүнд, мөн хоёр тэрбум төгрөг зарцуулах нь. Гэр хороололд шуудангийн үйлчилгээ, ил­гээмж хүргэх нь түвэгтэй байдаг. Тиймээс гэр хороололд шуудангийн хайрцагууд байр­­луулах, аймгууд руу шуу­дан­гийн машин тогтмол явуулдаг болоход 1.9 тэрбум зарцуулах юм байна.

Ингээд Ерөнхий сайдыг мэдээллээ хийсний дараа пар­ла­мент дахь сөрөг хүчнийхэн түүнээс болон Засгийн газрын зарим гишүүнээс сонирхсон асуултдаа хариулт авлаа.

УИХ-ын гишүүн Н.Энх­болд: -Сонгууль болоод тэгж байна уу, зарим улстөрчтэй холбоотой санхүүгийн хэрэг мандаж байна. Тодруулбал, Ё.Отгонбаяр гишүүний эхнэр­тэй холбоотой хэргийн талаар цагдаагийн байгууллага мэ­дээ­лэл хийлээ. Ё.Отгонбаяр гишүүн ч үүнийг үгүйсгэж мэ­дээлэл хийсэн. Үүнд, то­дор­хойгүй нэг зүйл байна. Үнэ­хээр энэ хүний дансаар ор­сон, гарсан 500-гаад тэрбум төг­рөгийн гүйлгээ хийсэн юм уу. Энэ чинь Монголын нэ­лээн хэдэн банкны активтай тэн­цэх хэмжээний мөнгө. Бид төдийгүй олон нийт энэ мөнгөний хэмжээнд эргэлзэж байна. Ерөнхий сайд аа, та энэ талаар ямар мэдээлэлтэй байна вэ. Мэдээлэлгүй бол холбогдох байгууллагынхнаа дуудаж УИХ-ын танхимаас олон нийтэд зөв мэдээлэл өгүүлэхийг хүсч байна?

Ерөнхий сайд Н.Алтан­хуяг: -Надад энэ талаар ямар ч мэдээлэл алга.

УИХ-ын гишүүн Л.Энх-Амгалан: -Засгийн газар бон­дын хүүг төлсөн тухай мэ­дээлэл түгсэн. Энэ мөнгийг ямар эх үүсвэрээс төлсөн юм бэ?

Эдийн засгийн хөгжлийн сайд Н.Батбаяр: -Хуваарь ёсоор “Чингис” бондын хүү­ний төлбөрийг жилд хоёр удаа төлөх ёстой. Энэ дагуу Мон­голбанк 31 сая төгрөг төлсөн байгаа.

УИХ-ын гишүүн Д.Хаян­хяр­ваа: -Орон сууцны үнийг бууруулна гэж ярьж байгаа. Барилгын материалыг дэмжих чиглэлээр ямар арга хэмжээ авч байна вэ. Энэ чиглэлээр ямар төсөл хөтөлбөрүүд хэрэгжүүлж эхэлсэн бэ. “Гудамж” төслийг хэрэгжүүлэгч нь аль байгууллага юм бэ?

Барилга, хот байгуу­лалтын сайд Ц.Баярсайхан: -Барилгын ажлыг улирлын хамаарлаас гаргахын тулд эхний ээлжинд материалын үйлдвэрүүдийг дэмжих ёстой. Хөтөлийн цемент шохой, Дарханы Төмөрлөгийн үйлд­вэ­рийг оруулаад нийт 58 ор­чим тэрбум төгрөгийн хөн­гө­лөлттэй зээл олгосон. Үйлд­вэрлэсэн бүтээгдэхүүнийг нь барилгын үйлдвэрлэлд ашиг­лана. Гадаадаас цемент, арматурыг их хэмжээгээр ав­даг. Үйлдвэрлэлийнхээ ба­лан­сыг тооцож үзээд нэг сая орчим тонн цемент, 100 орчим мянган тонн арматурыг гадаадаас авна. Замын-Үүдийн түгжрэл харьцангуй багассан учир хангалт жигд болсон. Үнэ тогтвортой байгаа. Сүүлийн үед хийсэн судалгаагаар орон сууцны үнэ 1.8-10 орчим хувиар буурсан. Аймаг болгонд чулуу ангилан бутлах, цемент, бетон зуурмагийн, төмөр эдлэлийн үйлдвэр байгуулах нь зүйтэй гэж үзэж байгаа. Энэ чиглэлээр төслүүд хэрэгжүүлж эхэлсэн. Үүнээс гадна угсармал барилгыг дэмжих гурван төсөл бий.

Эдийн засгийн хөгжлийн сайд Н.Батбаяр: -Өргөн утгаараа “Гудамж” төсөл Эдийн засгийн хөгжлийн яаманд харьяатай. Хэн хийхээс гадна хийж бүтээж үр дүнд хүрэх нь чухал гэсэн зарчмаар ажиллаж байгаа.