Монгол Улсын түүхэнд байгаагүй эдийн засгийн өсөлт  ойрын ирээдүйд гарах төлөв бий хэмээн Дэлхийн Банкнаас  үзэж байна. Ингээд тус банк ирэх таван жилд дэмжлэг үзүүлэх Түншлэлийн стратеги тодорхойлж буй аж. Энэхүү Түншлэлийн стратеги нь Монгол Улсын Үндэсний хөгжлийн цогц бодлоготой уялджээ. Өнөөдөр хэдийгээр эдийн засгийн өсөлт  ашигт малтмалын үнэ ханш, экспортын байдлаас шалтгаалж буурсан ч ирээдүйд  огцом өсөлт гарна. Хэдийгээр эдийн засгийн өсөлт буурсан ч энэ онд хоёр оронтой тооноос буурахгүй гэсэн төсөөлөл гарч буй юм. Тухайлбал, энэ онд манай улсын эдийн засгийн өсөлт 13 хувиас буурахгүй гэж зарим эдийн засагч үзэж байна. Цаашид дэлхийд эдийн засгийн өсөлтийн хурдаар дээгүүрт бичигдэнэ. Зэс, алт, нүүрсний ордуудаа ашиглаж богино хугацаанд  дэлхийн дунд орлоготой улсын ангилалд орно гэж тооцож байна. Гэвч энэ бүхэн дардан замаар явахгүй. Эрсдэл бий аж.
Үүнээс сэргийлэхийн тулд макро эдийн засгийн тогтвортой байдлаа хангах, байгалийн нөөц баялаг болон түүнээс олох орлогоо зөв, зохистой ашиглах, хойч үедээ авч үлдэх ёстой юм.