Эрүүл мэндийн экс сайд нар ойрын үед хууль цагдаагийнхнаар гүйдэлтэй болоод байна. С.Батболдын Засгийн газрын үед энэ салбарын сайдаар ажиллаж байсан Н.Хүрэлбаатарыг цагдаагийнхан саяхан хорьж, шалгаж эхэлсэн. Тэгвэл түүнээс өмнө Эрүүл мэндийн сайдаар ажилласан С.Ламбааг хуулийнхан шалгаж эхэлсэн байна. Энэ нь Эрүүл мэндийн яамны Төрийн нарийн бичгийн дарга асан Н.Түмэндэмбэрэлтэй холбоотой аж. Хоёр тэрбум төгрөг хувьдаа завшсан гэж шалгагдаж буй Н.Түмэндэмбэрэл С.Ламбааг сайд байх үед Санхүү, хөрөнгө оруулалтын газрын даргаар ажиллаж байж. Харин Төрийн нарийн бичгийн даргаасаа сайдын суудалд шилжсэн Н.Хүрэлбаатарын албан тушаалыг авч үлдсэн учир түүний хэрэгт хоёр ч сайд шалгагдаж эхэлсэн нь энэ.
Н.Түмэндэмбэрэл “Лабтех” компанийг 2005 онд байгуулаад эм эмнэлгийн хэрэгсэл, багаж, төхөөрөмж, урьдчилан сэргийлэх вакцин, биобэлдмэл, лабораторын урвалж бодис, оношилгооны бэлдмэл оруулж ирдэг аж. Тендерийн комиссын даргаар ажилладаг байхдаа албан тушаалаа ашиглаж, өөрийн компаниа шалгаруулдаг байж. Түүнийг ажиллаж байх үед ЭМЯ 10 гаруй тэрбум төгрөгийн тендер зарлагдсан байдаг. Төсөв бага хуваарилагддаг гэж гомдол мэдүүлдэг Эрүүл мэндийн яамныхны дуулиан экс Төрийн нарийн бичгийн даргаасаа эхлээд хоёрын хоёр сайдаа араасаа чирэх нь.
Тэгээд ч хууль хяналтынхан хэн нэгнийг хэрэгт холбогдуулан шалгахдаа нам хүчний харьяаллаар ангилдаггүй. Ингэж хэлэхийн учир МАН-ынхны зүгээс хууль хяналтынхан  АН-ын захиалгаар ажиллаж байна гэж чуулганы танхимд мэдэгдсэнтэй холбоотой. АН-ын зарим гишүүн ч хууль хяналтын байгууллагын үүд сахиж, гэм буруугаа тогтоолгохоор явж буйгийн нэг жишээ С.Ламбаа болж байна.