Дундаж давхаргын, тогт­мол орлоготой иргэдэд най­ман хувийн хүүтэй орон сууц­ны зээл олгох ажлын анхны өдрийн мэнд хүргэе. Өнгөрсөн баасан гарагт Монголбанкны ерөнхийлөгч Н.Золжаргал дээрх тогтолцоог босгоход гар бие оролцох хүмүүстэй уулз­лаа. Тухайлбал, Монголын ипо­те­кийн корпорацын тэргүүн Д.Гантөгс болон арилжааны 15 банкны гүйцэтгэх захирлыг хүлээн авсан юм. Байнгын санхүүжилттэй ипотекийн зээл иргэдэд найман хувийн хүү­тэй хүрч байгаа бол Мон­голбанкнаас дөрвөн ху­вийн хүүтэй гарч буй гэнэ. Арил­жааны банкаар дамжсан зээл иргэдэд инфляцын төвшнөөс хамаарч 7-9 хувийн хүүтэй хүрэх юм. Аль нэг банкинд зээл олгох тоо хязгаар тогтоогоогүй учраас иргэд өөрт илүү ойр банкийг сонгох нь зүйтэй юм.

Жилээс жилд гэр хо­роол­лыг багасгах том зорилготой галт тэрэг хөдөл­лөө. Нийслэл хот бай­гуулагдсанаас хойш төв­лөр­сөн хашаа, байшин хэр хурдан багасах нь дээрх гэрээний хэрэгжилтээс шууд хамаарна.
Орон сууц, тохилог хороолол, хотхоноор солигдох ажил 10 төрлийн гэрээ, баримт бичгээр зохицуулагдах аж. Н.Золжаргал, Д.Гантөгсөөс гадна манай улсын тогтвортой үйл ажиллагаа эрхэлж буй 15 компанийн гүйцэтгэх захирал гэрээнүүдийг үзэг­лэ­лээ. Төрийн банк, Хас, Худалдаа хөгжлийн банк, Голомт, Хадгаламж, Хаан, Улаанбаатар хотын банк, Капитал, Капитрон, Кредит, Чингис хаан банк, Үндэсний хөрөнгө оруулалтын банк, Тээвэр хөгжлийн банк, Эрэл банкны гүйцэтгэх захирал хүрэлцэн ирсэн юм. Өнөөдрөөс зээл олгох ажилдаа орж буй тул өнгөрсөн амралтын өдөр тэдний хувьд маш завгүй, ажил ихтэй байсан нь мэдээж.

Тийм ч учраас ёс­лол дуусмагц банкны удирд­ла­гуу­дын дийлэнх нь яаран бу­цаж, сэтгүүлчдийн асуултад ч хариулах завгүй байгаагаа учир­ласан. Харин Төрийн банкны гүйцэтгэх захирал Д.Бат­сайхан болон “Голомт”, “ХААН” банкны гүйцэтгэх захи­рал шинэ зээлийн талаар сэт­гэгдлээ хуваалцлаа.

Төрийн банк- Д.Батсайхан: Бид орон сууцны зээлд харьцангуй туршлагатай

Өнөөдрийн байдлаар өндөр хүүгээр орон сууцны зээл авсан 29 мянга гаруй харилцагч байдаг юм. Бүгдийнх нь зээлийг даваа гарагт найман хувийн хүү рүү автоматаар шилжүүлнэ гэвэл замбараагүй явдал болно. Мэдээж хэрэг харилцагчдаа дараалалд удаан зогсох, материал бүрдүүлж, банкаар очуу­лах­гүйгээр ший­дэ­хийг хичээнэ. Тиймээс 6-7 са­рын хугацаанд шилжүү­лэх про­цедур хийхээр Мон­гол­банк­тай ярилцсан. Яагаад ийм урт хугацаа орох вэ гэ­вэл Монголын Ипотекийн кор­по­ра­цитай хэлцэл хийхээс эх­лээд ажил их бий. Өндөр хүүг найман хувьд хүргэж шил­жүүлэх ажлыг арилжааны бан­кууд өөр өөрийн дотоод жур­маар шийдвэрлэхээр то­хир­сон. Түрүүлж зээлээ шил­жүүлсэн зээлдэгчийн хүүг багаар тооцох гэсэн ялгаваргүй учраас тэгтлээ их яарах хэрэггүй. Нөгөө талаас шинээр зээл авах хүмүүс маань бас яарах хэрэггүй гэж зөвлөе. Учир нь, санхүүгийн эх үүсвэр нь баталгаатай учраас ямар нэг саад, хүндрэл гарахгүй. Бид өмнө нь жилд зургаан хувийн хүүтэй зээл олгож байсан харьцангуй туршлагатай уч­раас асуудал бага гарах болов уу. Нөгөөтэйгүүр иргэдээс бүрдүүлэх материал шаардах болон явдал чирэгдэл уч­руулдаг зүйлсээ бид хоёр да­хин багасгаж байгаа.

“Голомт банк” - Д.Ганболд: Ипотекийн зээлийн 30 хувийг эзэлж байна

Жилийн найман хувийн хүүтэй зээл бүх банкинд нэгэн ижил гараанаас эхэлж байгаа. Тодруулбал, урьдчилгаа 30 хувь, хугацаа 20 жил, са­рын төлбөр орлогын 45 ху­вийг эзэлнэ гэх зэрэг нь адил­хан. Харин банкны үйл ажиллагаанд хамаарах зохион байгуулалт өөр байх бо­лов уу. Түүнчлэн банк бүр эрсд­лийн бодлогын хүрээнд үл хөд­лөх хөрөнгийн бүртгэлээр ялгагдах байх. Манай банкны хувьд одоо байгаа ипотекийн зээлийн 30 хувийг дангаараа эзэлдэг. Үүнд 268 тэрбум төгрөгийн моргейжийн зээл харьяалагдаж байгаа. “Голомт” банк ирэх даваа гарагаас /өнөөдрөөс/ Улаанбаатар хо­тын болон орон нутгийн 100 гаруй салбараараа дамжуулан Орон сууцны ипотекийн санхүүжилтийн тогтвортой тогтолцооны зээлээ олгох болно.

“ХААН банк” - Норхико Като: Харилцагчдад хамгийн таатай нөхцөл

Энэ зээлийг зөвхөн даваа гарагт олгоод дуусчихгүй уч­раас иргэд шаардлагатай ба­римт, материалаа бүрэн бэ­лэн болгочихоод, орон сууцаа зөв сонгочихоод банк руу зориосой гэж хүсч байна. Яагаад гэвэл санхүүгийн эх үүсвэр хангалттай шүү дээ. Харилцагчдын хувьд хамгийн таатай нөхцөл ирсэн, олон улсын стандартад нийцсэн маш сайн схем бүрдлээ гэж “ХААН” банкны эдийн засагчид дүгнэсэн. Япон улсад яг ийм ажил Дэлхийн хоёрдугаар дайны дараа хэрэгжсэн байдаг. Гэвч дайны дараахан банкууд тийм ч хүчтэй болж амжаагүй, Засгийн газрын хүлээсэн үр дүнд хүрээгүй тул орон сууцны зээл эрсдэж байсан түүхтэй. Харин өнөөдөр Монгол Улсад бүх банк хүчирхэг төлөвшилтэй, иргэд ч зээл авах сонирхолтой болоод байгаа. Өнөөдрийн байдлаар манай улсад орон сууцны зээлийн хүү жилд 2-3 хувь байна. Хэдийгээр манай хоёр орны эдийн засаг ялгаатай ч өнөөдөр үзэглэж буй гэрээ их өөрчлөлт авчирна.

“Худалдаа хөгжлийн банк” - Л.Соронзонболд: Зээл шилжүүлэх ажилд санаа зоволтгүй

Арилжааны банкнаас тогтоосон өндөр хүүг жилд найман хувь болгон шилжүүлж буй нь  харилцагчдын талд том боломж. Зээлийн хүү 8-10 хувиар буурч, зөрүү төл­бөр иргэдэд хүрч байгаа нь их давуу тал. Өнөөдрийн байдлаар ипотекийн зах зээлийн 28 хувийг “Худалдаа хөгжлийн банк” эзэлж байгаа ч зээл шилжүүлэх, гэрээ шинэчлэх ажлыг өөрсдөө гардан гүйцэтгэх учраас банк руу яарч, сандрах зүйлгүйг анхааруулъя.

Монголбанкны ерөнхийлөгч Н.Золжаргал: Хүүгийн хэлбэлзэл шинээр зээлдэгчдэд хамаатай

Иргэдээ сайхан амьдруулах, дундаж давхаргынхнаа хүч­тэй, хуримтлалтай болгох эхлэлийг тавьж, мастер гэрээ үзэглэж байгаадаа баяртай байна. Ипотекийн зах зээлийг өргөжүүлэн ойрын ирээдүйд уг зах зээлийг 4-5 их наяд төгрөгт хүргэх сайхан боломж нээгдлээ. Энэ ипотекийн зээлийн хөтөлбөрийг амжилт­тай хэрэгжүүлснээр иргэдийн орлого хэрэглээнээс хуримтлал руу шилжих, хөдөлмөрийн үнэлгээ болон бүтээмж дээ­шилж, хөдөлмөрийн зах зээл тунгалагшина. Зээлийн хувьд инфляц багасахад долоон хувь, инфляц өсөхөд есөн хувьд хүрэх уян хатан хүүтэй байх юм. Ингэхдээ хүүгийн хэлбэлзэл зээлдэгч бүрт биш, тухайн үедээ шинээр зээл авч буй хүмүүст л хамааралтай.