УИХ дахь МАН-ын бүлэг өнөөдөр ээлжит бусаар хуралдсан юм. Хуралдааны дараа тус намын бүлгийн дэд дарга УИХ-ын гишүүн С.Бямбацогт сэтгүүлчдэд мэдээлэл өгсөн юм. Тэрээр хэлэхдээ, “Өнгөрсөн долоо хоногт болсон МАН-ын Бага хурлын дараа МАН-ын Удирдах зөвлөл хуралдаж, УИХ-ын чуулганы ээлжит бус хуралдааныг хуралдуулах шаардлагатай гэсэн чиглэл өгсөн. Шинэчлэлийн гэх тодотголтой Засгийн газар болохгүй, бүтэхгүй, хийж чадахгүй байгаа ажлаа МАН руу чихэж, өмнөх Засгийн газрын алдаа байсан гэж ярих боллоо. Нэг жилийн хугацаанд өмнөх алдааг нь засах боломж байсан. Гэвч алдаа байсан бол засах байтал засахгүй, муулж байгаа нь тэд хийж чадахгүй байгаагийн илрэл. Тиймээс хариуцлагатай ажиллахыг МАН-ын бүлэг шаардаж байна” гэв.
Мөн Монгол Улсын нийгэмд үүсээд байгаа нөхцөл байдалтай уялдуулан хариуцсан албан тушаалтнуудад хариуцлага тооцож, арга хэмжээ авахыг Засгийн газарт сануулж байгаагаа МАН-ынхан танилцуулсан юм. МАН-ын бүлгийн дэд дарга С.Бямбацогтын мэдэгдсэнээр тус бүлгээс УИХ-ын дарга болон Ардчилсан намынханд шаардлага хүргүүлэхээр болж, 2013 оны төсөвт тодотгол хийх, валютын нөөцтэй болох, эдийн засгийн хүнд үед шаардлагатай арга хэмжээ авахын тулд ээлжит бус чуулганыг хуралдуулах албан ёсоор шаардахаар болжээ. Бүлгийн зүгээс ээлжит бус чуулганыг энэ сардаа багтаан зарлах ёстойг гэж үзэж байгаа юм байна.