Улс төрөөс бүрэн хөндийрсөн гэдгээ “Улс төрийн амьдрал бүрэн дүүрэн, дүүрэн хаазтай ч гэмээр юм уу даа оролцох боломжгүй л болсон юм бол тэр хавьд сүүтэгнэж, өдөр хоногоо барж байх хэрэггүй” хэмээн Ерөнхийлөгчийн сонгуулийн өмнөхөн би энд чинь өрсөлдөхгүй ээ, би улс төрөөс хөндийрсөн хүн  гэдгээ хэлээд Сонгогчийн байр сууринаас оролцоод өнгөрсөн Ерөнхий сайд асан С.Баяр намын бага хурлынхаа өмнөхөн гарч ирсэн нь олон хүнийг алмайруулсан гэхэд хилсдэхгүй. Тэрээр сүүлийн хэдэн сар ямар ч байсан эх орондоо байгаа аж. Албан бус эх сурвалжийн мэдээгээр түүнийг хилийн дээс алхахыг нь шууд хориглоогүй ч холбогдох газраас ийм хүсэлт тавьсан бололтой.  Чухам ямар хэргээр, яагаад шалгах гээд байгаа тухай мэдээлэл одоогоор алга.
УИХ-ын гишүүнээр дөнгөж сонгогдохдоо 5,3 сая төгрөг байсан орлого нь Ерөнхий сайдын алба хашаад жил гаруй болсны дараахан 20 дахин өсч 109 саяд хүрсэн байдаг. Мөн “Гэрээ сайн болсон, улс төрийн болоод бусад бүх хариуцлагыг бид хүлээхэд бэлэн” хэмээн ам гарсан Оюу толгойн гэрээ нь чухам яагаад өнөөдрийн байдалд хүргэв, үүний хариуцлагыг хэнд үүрүүлэх ёстой вэ гэх зэрэг олон асуултын хариуг зөвхөн түүнээс эрэх нь дамжиггүй учраас хилийн дээс алхах эрхийг нь хязгаарлахад гайхаад байх зүйлгүй л бололтой.