Засгийн газрын иргэдээс санал хүсэлт, гомдол, талархал, шүүмжлэл хүлээн авах “11 11 төв”-д 2013 оны 10 дугаар сарын 18-25-нд 673 иргэн холбогдсоны олонх нь нийслэл хоттой холбоотой дэд бүтэц, орон сууцны халаалт, халуун усны асуудлууд болон хөдөө орон нутгуудаар цаг агаар муудсантай холбоотой өвөлжилтийн бэлтгэл яаралтай хангахыг сануулжээ.

Сэлэнгэ аймгийн Баянгол суманд цасан шуурга болж байна. Гэтэл орон сууцнуудад галлагаа өгөхгүй байна. Өвлийн бэлтгэл ажил өнөөдрийг хүртэл хангагдаагүй байгааг хэлээд яаралтай арга хэмжээ авч өгөхийг хүсч иргэн Уранчимэг ханджээ.

Хүчит шонхор зах дээр махны үнэ бууж байна. Гэтэл захууд түрээсээ нэмснээс махны үнэ дахин өслөө. Махны ченжүүд хямд мах авдаг ч өндөр үнээр зарж байгаад шалгалт хийж, үнийн хөөрөгдөлд хяналт тавихийг хүсчээ. Энэ асуулдалд ҮХААЯ “Иргэд, аж ахуйн нэгж байгууллагын худалдаа хийж байгаа үнийг яамнаас зохицуулах боломжгүй. Иргэдэд хямд үнээр мах борлуулах зорилгоор жил бүр мах нөөцөлж өвөл, хавар борлуулдаг. Улсын төсвийн хөрөнгөөр бэлтгэдэг нөөцийн махнаас бусад махны үнийг зохицуулж хяналт тогтоох боломжгүй. Зах зээлийн зарчмаараа явах ёстой” гэсэн тайлбарыг өгчээ гэж Засгийн газрын Хэвлэл мэдээлэл, олон нийттэй харилцах албанаас мэдээллээ.