УИХ-ын чуулганы нэгдсэн хуралдаанаар Төрөөс эрдэс баялгийн салбарт баримтлах бодлого батлах тухай УИХ-ын тогтоолын төслийн анхны хэлэлцүүлгийг хийлээ. Уг баримт бичигт хариуцлагатай уул уурхайг дэмжих тухай заалт орсоныг чангатгах талаас нь нэмэх санал хэлэв. Хариуцлага тооцох асуудлыг төсөлд нэмж тусгаж болно гэж төсөл санаачлагч хариуллаа. Үүнээс гадна бүтээгдэхүүн боловсруулах бүтээгдэхүүний жагсаалтад шар нунтаг гэж оруулсан байна. Ураны шар нунтгийг боловсруулах үйлдвэрлэлийг дэмжвэл цөмийн түлш бэлтгэнэ, үүнээс нь цөмийн хаягдал гарч, булшлах асуудал ч яригдана гэсэн үг хэмээсэн. Төрөөс эрдэс баялгийн салбарт баримтлах бодлого батлах тухай УИХ-ын тогтоолын төсөлд тусгасан энэ заалтыг хасна  гээд төсөл санаачлагч гишүүдийн хэлсэн санал, шүүмжлэлийг тусгаж, багтаана гэсэн юм. Ингээд тогтоолын төслийг дараагийн хэлэлцүүлэгт оруулахаар тогтов.