Дархан-Уул аймгийн АН-ын удирдлагууд “Дархан-Уул аймгийн АН-ыг шинэчлэх хөдөлгөөн” байгуулжээ. Тэд намаа шинэчлэхийн тулд анхан шатны үүрүүдэд АН-ын үндсэн дүрмийн хүрээнд шударга сонгууль явуулж шийдвэрлэхийг хүсч байгаа аж. Энэ сарын 18-нд хуралдсан Хяналтын ерөнхий хорооны 02 тоот тогтоолыг хэрэгжүүлж өгөхийг АН-ын удирдлагуудаас ийнхүү хүсэв. Хэрэв тогтоолыг даруй хэрэгжүүлэхгүй бол улс төрийн суулт зарлана гэж мэдэгдлээ.
Дархан-Уул аймгийн АН-ын дарга асан тус хөдөлгөөний тэргүүн Л.Наранбаатар “Дарханы АН-д салхи оруулах цаг болсон. Энэ нам ахмад гишүүдээ харж үзэхгүй, шинэ залуу боловсон хүчнээр хүрээгээ тэлдэггүй, зөвхөн “Бурхан Халдун” группийн хэдхэн ажилчны дунд л оршин тогтнож ирсэн. Үүнээс болж сүүлийн сонгуулиудад ялагдал хүлээсэн. Тухайлбал, Дархан-Уул аймгаас 2004 онд гурван гишүүн сонгогдож байсан бол өнөөдөр Ардчилсан засаг барьж байгаа үед нэг ч гишүүнгүй байна. Орон нутагт тэр чигтээ ялагдсан. 18 багийн Засаг даргаар АН-ын нэг ч хүн ажилладаггүй. Энэ мэтээс өмнөх удирдлагууд Дарханы АН-ыг хэрхэн удирдаж байсан нь харагддаг. Тиймээс өөрийн хүсэлтээр ажлаа хүлээлгэж өгөх хэрэгтэй. Дарханы АН-ын гишүүд ч үүнийг хүсч байгаа” гэлээ.
АН-ын ерөнхий нарийн бичгийн дарга Ц.Оюундарийн тус аймгийн намынхантай хоёр удаа уулзалт хийж, анхан шатны үүрүүдээ хуралдуулж даргаа сонго гэж тохиролцсон. Ийм учраас Хяналтын ерөнхий хорооны тогтоолыг хэрэгжүүлэхийг шаардаж, АН-ын дарга Н.Алтанхуяг болон Ерөнхий нарийн бичгийн дарга Ц.Оюундарь нарт шаардлага хүргүүлэв.