Шүүхийн иргэдийн төлөөлөгчийн эрх зүйн байдлын тухай хуульд иргэдийн төлөөлөгч шүүн таслах үйл ажиллагаанд шүүгчтэй тэгш эрхтэй оролцохоор тусгасан. Өөрөөр хэлбэл, шүүх хуралд сууж буй иргэний төлөөлөгч өмнөх шигээ билэг тэмдэг байдлаар оролцохоо больсон гэсэн үг.

 Харин Үндсэн хуулийн цэц Шүүхийн иргэдийн төлөөлөгчийн эрх зүйн байдлын тухай хуулийн иргэний төлөөлөгчтэй холбоотой зүйл заалт нь Үндсэн хуулийн “Ерөнхийлөгч, Ерөнхий сайд, Улсын Их Хурлын ба Засгийн газрын гишүүн, төр, нам, олон нийтийн бусад байгууллагын албан тушаалтан, иргэн хэн боловч шүүгчээс шүүн таслах үүргээ хэрэгжүүлэхэд хөндлөнгөөс оролцож болохгүй” гэсэн заалтыг зөрчсөн байна гэсэн дүгнэлтээ гаргасан юм. Тиймээс тус хуулийн зохих зүйл заалтыг энэ оны 11 дүгээр сарын 13-ны өдрөөс эхлэн түдгэлзүүлээд байв.

Иймээс УИХ-ын чуулганы өнөөдрийн үдээс өмнөх хуралдаанаар Шүүхийн иргэдийн төлөөлөгчийн эрх зүйн байдлын тухай хуулийн зарим заалт Үндсэн хуулийн холбогдох заалтыг зөрчсөн эсэх тухай маргааныг хянан шийдвэрлэсэн тухай Үндсэн хуулийн цэцийн 2013 оны 04 дүгээр дүгнэлтийг хэлэлцлээ. Цэцийн энэхүү шийдвэрийг УИХ-ын гишүүн Х.Тэмүүжин, А.Даваасүрэн нар Үндсэн хуулийн цэц ард түмний эсрэг ажиллаж байна, нийгмээсээ тусгаарлагдсан байна гэсэн байр суурьтай байгаагаа илэрхийлэв. Харин Д.Дэмбэрэл, иргэний төлөөллийг шүүн таслах үйл ажиллагаанд оролцуулах нь зүйтэй. Иргэний төлөөлөгчийг хөндлөнгийн нөлөөлөл гэж ойлгож болохгүй. Цэц их суудлын хуралдаанаар иргэний төлөөллийн асуудлыг дахин нухацтай авч хэлэлцэх байх гэв.

Хуралдаанд оролцсон гишүүдийн олонх цэцийн дүгнэлтийг хүлээн авах боломжгүй гэж үзэн УИХ-ын тогтоол баталлаа.