Түүнчлэн сайны хажуугаар саар гэгчээр уул уурхайн салбарт сөрөг зүйл байгааг Уул уурхайн сайд хэллээ. Тухайлбал нийлүүлэлтийн тогтвортой байдал, тээвэрлэлтийн зардал өндөр, санхүүгийн чадавхи, бизнес хэлэлцээр, арилжааны гэрээ байгуулах чадвар муу, худалдан авагчийн тоо цөөн зэрэг нь нөлөөлдөг байна. Тиймээс уул уурхайн салбарыг өрсөлдөх чадвар, үр ашгийг нэмэгдүүлэхэд анхаарч ажиллахаар болжээ. Ингэхдээ уул уурхай, газрын тосны салбар нь ойрын ирээдүйд эдийн засгийн тогтвортой хөгжлийн гол хөдөлгүүр гэдгийг нийтээр хүлээн зөвшөөрөх, эрхзүйн орчин нь урт хугацаанд тогтвортой, өрсөлдөх чадвартай байх, бодлогын зорилтуудыг хэрэгжүүлэх хөгжлийн стратегийг боловсруулж алсын хараатай хөгжих юм байна. Мөн үр ашгийг дээшлүүлэхийн тулд тээвэр ложистик зэрэг дэд бүтцийн салбарын өрсөлдөх чадварыг нэмэгдүүлэх, зах зээлээ өргөжүүлэхэд анхаарах аж. Худалдан авагчийн тоог нэмэгдүүлэх, санхүүжилтийн боломжийг өсгөх, эрдэс, түүхий эдийн боловсруулалтын түвшинг олон улсын жишигт хүргэх, нэмүү өртөг шингэсэн бүтээгдэхүүн үйлдвэрлэх, газрын хэвлий дэх эрдсийг нээж, баялгийн нөөцийг нэмэгдүүлэх зорилгоор Үндэсний геологийн албыг байгуулан ажиллах юм байна.