“Нар хажид сүм”-ийн үүсгэн байгуулагч Д.Мэндбаяр Гандантэгчинлэн хийдийн тэргүүн хамба Д.Чойжамцыг АТГ-т шалгуулна хэмээн өчигдөр сэтгүүлчдэд хандлаа. Тэрээр “Тэргүүн хамба Д.Чойжамцыг ТВ9 телевизийн асуудлаар АТГ-аас дуудаж мэдүүлэг авч байгааг дэмжиж байгаа. ТВ9 телевиз бол гадаадын бурхны шашны байгууллагуудаас Гандантэгчэнлин хийдэд өгсөн тусламж дэмжлэгийн багахан хэсэг нь. Өнгөрсөн хугацаанд тус хийд Японы бурхны шашны дэлхийд алдартай, НҮБ-д бүртгэлтэй “Омото”, “Агоншү”, “Нимбүцүшү” гэсэн томоохон байгууллагатай харилцаж ирсэн. Эдгээр байгууллага чухам хэзээ, ямар хандив тусламж өгч байсан бэ гэдгийг АТГ шалгах шаардлагатай” гэв.
 Түүнчлэн Гандантэгчинлэн хийд сүүлийн 20 жилд санхүүгийн үйл ажиллагааны журамгүй, тайлан төсөвгүй, хяналтгүй явж ирсэн гэнэ. Хамгийн сүүлд аудитын шалгалт орохдоо тус хийдийн санхүүгийн нэгдүгээр гарын үсэг зурдаг хүн нь өөрийнхөө төрсөн дүүгийн аудитын компаниар шалгалт хийлгүүлсэн байгаа юм. Ингэхдээ шалгалт хийсэн хүн бүрт таван сая төгрөг өгсөн. Жүд дацанг л гэхэд 1.3 тэрбум төгрөгөөр барьсан. Одоо 30 тэрбум төгрөгөөр гантиг чулуун хашаа барина гэж байгаа зэрэг Гандантэгчинлэн хийдтэй холбоотой зарим баримт мэдээллийг АТГ-т өгч, шалгуулах юм байна.