Монгол ардын намын хоёр гишүүн намаасаа гарч МАХН-ын гишүүнчлэлээ сэргээхээр боллоо гэх мэдээлэл гэнэт түгсэн. Тодруулбал, УИХ-ын гишүүн Б.Бат-Эрдэнэ, УИХ-ын Тамгын газрын даргаар ажиллаж байсан Ц.Шаравдорж нар. Мэдээллийн мөрөөр холбогдох эх сурвалжаас тодруулахад тоймтой зүйл хэлээгүй юм. МАН-ын гишүүд “Өчигдөрхөн уулзахад тийм зүйл хэлээгүй, яриагүй, мэдэхгүй” гэж байсан бол МАХН-ын нэр бүхий эрхмүүд “Тийм ээ, өнөөдөр ахмадуудаа хүлээн авах уулзалтын үеэр намын батлахыг нь гардуулна” гэцгээв.

Гэвч ахмадын уулзалтад Ц.Шаравдорж ирсэн ч Б.Бат-Эрдэнэ ирээгүй юм. Намын Ерөнхий нарийн бичгийн дарга Г.Шийлэгдамба “Манай намын үүд хаалга бүгдэд нээлттэй байх болно. Б.Бат-Эрдэнийн хувьд үнэнийг өөрөөс нь асуусан нь дээр” гэж булзаарууллаа. Төд удалгүй Төрийн ордонд Б.Бат-Эрдэнэ мэдээлэл хийхдээ “Сүүлийн үед намайг МАХН-ын гишүүнчлэлээ сэргээх гэж байна, тэр бүү хэл намын дэд даргын тушаалд очих нь гэх мэт мэдээлэл хэвлэлээр гарсан. Энэ бүхэн худал гэдгийг албан ёсоор мэдэгдье, би МАХН-д элсэхгүй” хэмээлээ. Мөн тэрээр Ерөнхийлөгчийн сонгуулийн үеэр нээж, ашигласан фэйсбүүкийн фэн хуудсаа хаасан гэнэ. Учир нь, албан ёсоор өөрөө хөтөлдөггүй учраас буруу зөрүү ойлголт үүсэх шалтгаан болоод байжээ.