Сонгогчдын нэрсийн жаг­саалт хуулийн хугацаандаа гарчээ. Сонгууль юу юугүй хаалга тогшоод ирлээ гэд­гийг батлах мэт улс төр хялайлтын байдалд шилж­лээ. Хэн юу хийж байна вэ, хэн аль тойргоос УИХ-д нэр дэвших бол хэмээн тандсан, хардсан байдалд арай гэрэл тусгаж байгаа зүйл бол “100 мянган айлын орон сууц” хөтөлбөр л байна. Худлаа даа, сонгуулийн ээлжит шоу биз гэж хүлээж авсан ч “хөөцөлдөөд үздэг ч юм бил үү” хэмээн битүүхэндээ горьдлого тээгсэд 100 мян­гаас илүү байгааг эрх ба­ригчид тун овжин ашиглаж эхэллээ. УИХ Парламентын ордон барих талбай олох гэж бараг таван жил мунгинасан ч “100 мянган орон сууц” барих газар нийслэлд байна хэмээн бидэнд итгүүлэх гэж оролдож л байна. Саяхан засгийн хуралдаанаар тус хөтөлбөрт хамрагдаж Улаанбаатар хот, бүсийн тулгуур төв, айм­гийн төвд баригдах орон сууцны барилга, хот­хон хорооллын хоёр дахь ээлжийн жагсаалтыг батлав. Ингэснээр 79 мянган орон сууцны барилга 44700-гаар нэмэгдэн 124 мянга болов. Энэ нь, орон сууцны үнэ буурах “аймаар” том боломж гэнэ. Ёстой “Цогт тайж” кино­ны Арслан тайжийн “бол­тугай болтугай” хэмээх бэ­лэн ерөөлийг өргөхөөс өөр яалтай. Парламентын ордон барих талбайг олохоос амар­хан шийдэгдэж байгаа “100 мянган орон сууц” хөтөлбөр давчуу улстөрийн гол стратеги болж байна.
Баасан гаригт Төв банк бодлогын хүүгээ 0.5 хувиар нэмснээ дуулгаж байгаа ч энэхүү хөтөлбөрийг эхлүү­лэхийн тулд Капитал, Төрийн банкныхан Засгийн газрын бонд гарч мөнгө орж ирэхээс урьтан өөрийн хөрөнгөнөөс чадлынхаа хэрээр зээл олгоё хэмээн толгой дохилоо. Ха­­рин зарим арилжааны банк жижиг зээлүүд олго­хоос татгалзаж байгаа ч сон­согдов. Ашгийн төлөө нэг­дүгээрт гэсэн уриатай арил­­жааны банкуудыг тол­гой дохиулж чадна гэдэг энэхүү стратегийн нэг том ололт. ЗТБХБ-ын сайд Ц.Дашдорж дэд сайд байх­даа 40 мянган орон сууц хөтөлбөр хэрэгжүүлэх ажлын хэсгийг толгойлон ажиллаж, 27000 өрхийг орон сууцтай болгосон туршлагаа суурь болгон 100 мянган орон сууц хөтөлбөрийг чадлынхаа хэрээр PR-даж байна.
Анх удаа орон сууц авах гэж байгаа нь үнэн гэсэн тодорхойлолт авахын тулд Улсын бүртгэлийн ерөнхий газрын үүдэнд өдөрт багаар бодоход 700 хүн дугаарлаж, 400 хүн нь лавлагааны хуудас бөглөх эрхээ авч, үлдсэн нь маргааш хэмээн буцаж байгаа бол төдийлэн танил биш байсан Орон сууц санхүүжилтын корпорац гэх агентлагийн нэр олны танил боллоо. Энэ бүх дуулианаар барилгын хэдэн компани барь­сан байшингийнхаа үнийг хөөрхөн хөөргөөд амж­лаа. Орон сууц хай­сан хүмүүс барилгын компа­ниу­дын утсыг улайстал ярьж, хямд бас ам.метр багатай нь гэсээр… Гурав, дөрөвдүгээр сардаа ямартай ч үүрэн телефоны компаниуд багагүй орлоготой байх нь тодорхой болов. Гэвч…
Энэ бүхний цаана хамгийн гол нь авах байр нь алга. Ам.метр нь багадаа нэг сая 400 мянган төгрөг болчихсон байдаг. Гэтэл улсаас өгөх зээл нь 50 сая. 50 сая төгрөгтөө ам.метр нь нэг сая 400 мянган төгрөгийн байр авлаа гэж бодоход 35 ам.метр талбай бүхий л орон сууц авах нь. Тэгвэл санал болгоод байгаа 55 ам.метр талбайгаар нь тооцоод үзье л дээ. 55 ам.метр талбай бүхий жижигхэн гурван өрөө байр авахад 77 сая төгрөг төлөх хэрэгтэй болох нь.  Өөрөөр хэлбэл,  засгаас 50 сая төгрөгөө зээлээд 27 сая төгрөг таны халаасанд бэлэн байх хэрэгтэй гэнэ. Яг үнэнийг хэлэхэд 27 сая төгрөг халаасалчихаад сууж байгаа бага дунд орлоготой иргэнийг олоход тун хэцүү л болов уу.
МАН-ын сонгуулийн өм­нөх бужигнаанаар ашгүй цөөн ч гэсэн хэдэн өрх өөрийн гэсэн орох оронтой болох дог оо. Харин хэтэрхий хөөрөөд баахан байр барьчих гээд байгаа барилгын компа­ниудын хувьд ирээдүй хэрхэн эргэх нь яг үнэндээ төдийлэн тодорхой биш л байна.