УИХ-ын нэгдсэн чуулганы өчигдрийн хуралдаанаар УИХ, НИТХ-ын сонгуулийг зургадугаар сарын 28-ны пүрэв гаригт явуулах товыг зарлав. Харин гадаадын улс орнуудад ажиллаж, амьдарч байгаа Монгол Улсын иргэд тухайн улсын дипломат төлөөлөгчийн газраар дамжуулж зургадугаар сарын 10-ны өдөр сонгуулиа өгөх юм. УИХ-ын сонгуулийг зохион байгуулахад 16.8 тэрбум төгрөг зориулах юм. Харин НИТХ-ын сонгуулийн төсөв тусдаа. Энэ оны төсвийг батлахдаа Орон нутгийн сонгуулийг зохион байгуулахад 700 сая төгрөг тусгаж өгсөн. Үүнээс НИТХ-ын сонгууль зохион байгуулах хөрөнгийг гаргахаар боллоо.
Өмнөх сонгуулиар тойрог, хэсгийн хороонд ажиллах хүмүүсийн цалинг хөдөлмөрийн хөлсний доод хэмжээгээр тооцож олгодог байсан. Харин энэ удаагийн сонгуулиар тойрог, хэсгийн хороонд ажиллах хүмүүсийг 200 мянган төгрөгөөр цалинжуулахаар болжээ. Түүнчлэн өмнө 1700 хэсгийн хороотой ажиллана гэж байсан бол НИТХ-ын сонгуулийг хамт явуулахаар болсноор 2500 хэсгийн хороо байгуулахаар болсон байна.