Оюу толгойн өрийн данс нэмэгдсээр. Уг төслийн хувь нийлүүлэгчдийн гэрээнд 2011 оны зургадугаар сарын 8-нд Нэмэлт өөрчлөлт оруулж, дахин тодотгосон билээ. Энэ гэрээний дагуу “Туркойз Хилл ресурс” компани 2016 оны есдүгээр сарын 1-ний өдөр хүртэл Оюу Толгой төслийг санхүүжүүлэх үүрэг хүлээжээ. Ингээд “Оюу Толгой” ХХК нь дээрх гэрээгээр хувьцааны ногдол ашгаа төлөхөөс өмнө бүх зээлээр санхүүжүүлсэн өр, хүүгийн төлбөрийг бараг­дуулах ёстой аж.
Өнгөрсөн оны байдлаар “Туркойз Хилл ресурс” ком­па­нийн салбар компаниас “Оюу Толгой” ХХК-д өгсөн нийт зээл, хүүгийн дүн нь 6.8 тэрбум ам.доллар болжээ. Үүн дээр хуримтлагдсан хүү­гийн дүн 0.9 тэрбум ам.дол­лар нэмэгдэнэ.  Эдгээр зээлийн хүү нь LIBOR + жи­лийн 6.5 хувь аж. 

Нэмэлт өөрчлөлт оруулж, дахин тодотгосон хувь нийлүүлэгчдийн гэрээний дагуу, “Эрдэнэс Оюу Толгой” ХХК-ийн энгийн хувьцааны хөрөнгө оруулалтыг “Тур­койз Хилл ресурс” компа­нийн салбар компани санхүү­жүүлсэн байна.
Хувьцааны энэ хөрөнгө оруулалтыг “Эрдэнэс Оюу толгой” компани “Оюу толгой” ХХК-ийн өөрт ногдох ногдол ашгаас татгалзаж эргэн төлөх учиртай.  Мөн  “Эрдэнэс Оюу толгой” компани бэлэн мөнгө гаргаж  өрөө барагдуулж бо­лох юм. Өнгөрсөн оны  байд­лаар манай талд ног­дох 34 хувийн энгийн хувь­цааны санхүүжилтийн ху­римт­лагдсан дүн нь 751.2 сая ам.доллар болжээ. Үүн дээр хуримтлагдсан хүүгийн дүн нь 110.5 сая ам.доллар бас нэмэгдэх юм.  Тэгэхээр манай улс Оюу толгойн хөрөнгө  оруулагчид 861.7 сая ам.долларын өртэй болсон байна. Монгол Улсын Засгийн газар, “Туркойз Хилл ресурс”, “Рио Тинто” компаниуд хамтран хувь нийлүүлэгчдийн хооронд шийдвэрлэвэл зохих зарим асуудал хэлэлцэж байгаа.  Яриа хэлэлцээ ирд өрнөж байгаа хэдий ч далд уурхайн бүтээн байгуулалтын Техник, эдийн засгийн үндэс­лэлийг  боловсруулж дуусгах, бүх талууд хянан батлах, холбогдох бүх зөвшөөрлийг авах ажил удааширч  магадгүй ажээ. Уг ТЭЗҮ-г ирэх зургадугаар сард  багтаан дуусгах төлөвлөгөө бий. 

Энэ оны эхний гурван сарын  байдлаар Оюу толгой 43 мянган тонн зэсийн баяжмал борлуулсан байна. Төлөвлөгөө ёсоор энэ жил Оюу толгой 135-160 мянган тонн баяжмал дахь зэс, 600-700 унци баяжмал дахь алт үйлдвэрлэх юм.
Одоогоор энэ онд үйлд­вэр­лэхээр төлөвлөсөн бүтээг­дэхүүнийхээ 74 хувийг бор­луулах гэрээ хийжээ. Үүнээс гадна ирэх жил үйлдвэрлэх бүтээгдэхүүнийхээ  84 хувийг нь бас борлуулах гэрээтэй байна.