МАХН-ын дарга Н.Энхбаяр хуурай өлсгөлөн зарласнаас болж биеийн байдал нь муудаж, Урьдчилан хорих 461 дүгээр ангид ирээд буй. Тэгвэл түүний биеийн байдлын талаар МАХН-ын Ерөнхий нарийн бичгийн дарга Н.Удвал, түүний хүү Э.Батшугар нар мэдээлэл хийсэн юм. Өнөөдрийн байдлаар Н.Энхбаяр албан бусаар 64 цаг хуурай өлсгөлөн зарлаад буй юм. Мөн Н.Энхбаярын хүү Э.Батшугар ШШГЕГ-ын дарга М.Ганхүүд хаяглаж, өргөдөл гаргажээ. Өргөдөлд “Миний аав Намбарын Энхбаяр Сүхбаатар дүүргийн шүүхийн шийдвэрээр 461-р хорих ангид одоо хоригдож байна. Уржигдраас хуурай өлсгөлөн зарласан. Одоогоор миний аав хуурай өлсгөлөн зарлаад 51 цаг, хоол идэлгүй 72 цаг болж байна. Энэ нь амь нас эрүүл мэндтэй нь шууд холбоотой боллоо. Мөн бидний эцэг хүүхдүүд байх хувь тавиланд ч гэсэн аймшигт хагацал тохиож мэдэхээр байна. Хүүгийнх хувьд би аавтайгаа уулзах хүсэлтэй байна. Хамгийн сүүлд дахиад л хүнээр дамжлуулсан хэвтээ байдалтай харлаа. Аавын минь нэгэнтээ эхлүүлсэн үйл хэрэг ард түмний дэмжлэг авсан. Эргэж буцахааргүй болсон гэдгийг шударга ёсыг хүсэмжилж байгаа ард иргэдээс мэдэрч байна. Монгол түмэн аавд минь итгэдэг юм байна гэдгийг хэлье гэж бодож байна. Эх орон, шударга ёсны төлөө тэмцэж амь насаараа дэнчин тавин өлсгөлөн зарлаж байгаа зориг тэвчээрээр нь бахархаж байна. Иймд үр хүүхдүүд бид аавтайгаа уулзах хүсэлтэй байна” гэжээ. Өргөдлөө уншиж дуусаад Э.Батшугар, “Надад нэг минут ч гэсэн маш үнэ цэнэтэй байна. Тиймээс өргөдлөө ШШГЕГ-ын даргад хүргэж өгнө” гэсээр хэвлэлийн хурлыг орхин гарсан юм. Харин хуульч Э.Эрдэнэжамъян ”Монголд АТГ гэдэг жинхэнэ дарангуйлагч гараад иржээ. Хүний амь нас егүүтгээд цаазын ял авсан хүн гэр бүлийнхэнтэйгээ уулзах эрхтэй байдаг юм. Гэтэл АТГ-ынхан Н.Энхбаярыг гэр бүлийнхэнтэй нь уулзуулахгүй байна. ЭМЯ-наас томилогдон очсон эмчтэй нь уулзаж Н.Энхбаярын биеийн байдал ямар байгаа талаарх мэдээллийг авах гэтэл тэд бидэнтэй уулзаж мэдээлэл өгөөгүй. ШШГЕГ-ынхан Н.Энхбаярын бие эрс муудлаа эмч нарын багийг оруулаач хэмээн биднийг шаардахад шөнөжин хүлээлгээд үүрээр л эмч нарыг оруулсан. Яагаад та нар эмч нарыг саатуулж байгаа юм бэ гэж асуухад “Хэрвээ эмч нарыг оруулсан бол хууль зөрчсөн үйлдэл болно” гэх  тайлбарыг өгсөн” гэл ээ.