Оюу толгой, Таван толгой төслөөс манай улсад чамгүй  хөрөнгө оруулалт орж ирнэ хэмээн эрх баригчид үзэж буй. Гэвч одоогоор зэс, нүүрсний үнэ ханш унасан, дэд бүтэц хангалтгүй гэдэг шалтгаанаар үр ашгаа төдийлэн өгч чадахгүй байгаа. Тухайлбал, энэ онд Оюу толгой төслийн далд уурхайн бүтээн байгуулалтад хоёр тэрбум ам.доллар орно хэмээн найдаж байв. Гэтэл зэсийн үнэ унасан, ТЭЗҮ батлуулна гэдэг шалтгаанаар уг хөрөнгө оруулалт есдүгээр сар хүртэл хойшилсон.  
Ингэснээр манай улс ам.долларын эрэлт гарах  шаардлага тулгарлаа. Өөрөөр хэлбэл, төлбөрийн тэнцэлийн гаралтай хямралд өртөхгүйн тулд уг хөрөнгө оруулалтыг ойрын хугацаанд оруулж ирэхэд төрөөс анхаарах, дэмжлэг үзүүлэх талаар эдийн засгаа эрчимжүүлэх  100 хоногийн хөтөлбөрт тусгасан.  Өнгөрсөн сарын байдлаар Лондонгийн металлын бирж дээр нэг тонн цэвэр зэсийн үнэ 6670 ам.доллар байлаа.
Таван толгой ордын төслийг саадгүй түргэтгэхээр мөн дээрх хөтөлбөрт тусгасан. Уг төсөлд стратегийн хөрөнгө оруулалт  ойрын хугацаанд татах, дэд бүтцийг нь шийдвэрлэх арга хэмжээ авах болов. Таван толгой төсөлд дунд хугацаанд 3-5 орчим тэрбум ам.доллар шаардлагатай гэсэн тооцоо бий. Ингэснээр жилд 30 сая тонн нүүрс экспортлох, бүтээгдэхүүнээ боловсруулах, кокс үйлдвэрлэх бололцоо бүрдэх юм.