“Эрдэнэс Таван толгой” компанийн
нүүрсний борлуулалт дөрөвдүгээр сард буурсан ч өнгөрсөн сард сэргэж,
нэг сая орчим тоннд хүрлээ хэмээн албаныхан мэдэгдлээ.
Эхний таван сарын байдлаар “Эрдэнэс Таван Толгой” компани нийт хоёр сая гаруй тонн нүүрс борлуулжээ. “Чалко”-той байгуулсан гэрээний хүрээнд “Эрдэнэс Таван толгой” компанийн нүүрсний үнэд долдугаар сар хүртэл өөрчлөлт орохгүй бөгөөд Зүүн цанхиас Хятадын хилийн боомтын агуулахад хүргэсэн нэг тонн нүүрсийг 57 ам.доллараар худалджээ. Харин Баруун цанхийн нүүрсийг тонн тутмыг нь 34-37 ам.доллараар борлуулсан байна. Энэ онд “Эрдэнэс Таван толгой” компани 11 сая тонн нүүрс экспортлохоор төлөвлөжээ.
Дашрамд дурдахад өнгөрсөн хоёрдугаар сард “Эрдэнэс Монгол” компани Тавантолгой-Гашуунсухайт чиглэлийн авто замыг “Энержи Ресурс” компаниас барьсан өртөг болох 90 сая ам.доллараар худалдаж авсан. Ингэснээр “Эрдэнэс Таван Толгой”-н нүүрсний экспортын өртгийн 40 хувийг тээвэрлэлтийн зардлаасаа хэмнэх бололцоотой гэдгийг мэргэжилтнүүд хэллээ. “Энержи Ресурс” компанийн мэдэлд байх үед уг замын хураамж 3.8-4.8 ам. доллар байжээ.
