Сүүлийн үед энэ парламентад гайгүй сайн нударган зодоончид олшрох болов. Уг нь, анх байгуулагдаж байх үед “хамгийн олон бөхтэй” парламент гэж тодорхойлж байсан бол харин төгсгөл рүүгээ өөрчлөгдсөн бололтой. Өнөөдөр УИХ-ын гишүүн Д.Очирбат МАХН-ын нарийн бичгийн дарга Л.Цогийг ордны хонгилд барьж авч, гөвшиж харагдсан. Юунаас болж маргалдсан нь тодорхойгүй ч мань гишүүн, МАХН-ын нарийн бичгийн дарга хоёр багагүй л маргалдаж. Сумын заан цолтой бөх гишүүний хувьд бяр чадал, бие хаагаараа илүү гэдгээ ямартай ч харуулна билээ. Харин энэ үйл явдлын гэр болсон зурагчид, зураглаачдыг Д.Очирбат гишүүн Төрийн ордны хамгаалалтынханд ховлосон бололтой. Төрийн ордныхон нэгэн зурагчны камерыг шалгаж, зургийг нь устгав.
Ер нь, энэ парламентад зодоончид олон бий. ХЗДХ-ийн сайд Ц.Нямдорж л гэхэд Төрийн байгуулалтын байнгын хорооны дарга, УИХ-ын гишүүн Ж.Сүхбаатарыг өрөөндөө оруулж, боймолж унагаж байсан удаатай. Мөн УИХ-ын гишүүн Н.Батбаяр согтуу үедээ ордны хонгилд бас л нударганыхаа амтыг үзүүлж байсан. Зодоончид оо гэж...