Шил шилээ даран дампуурлаа зарласан Хадгаламж зээлийн хоршоодын хохирлыг барагдуулах, цаашид хэрхэх талаар УИХ-ын Хууль зүйн байнгын хороо Шүүхийн шийдвэр биелүүлэх газрын мэдээллийг сонсов. Хохирогчдын түр хорооныхны хэлж буйгаар хадгаламж зээлийн 29 хоршооны 8301 хохорогчийн 43 тэрбум төгрөгийн  битүүмжилсэн аж. Үүний 50 хувийг төрөөс барагдуулсан ч тэр цагаас хойш найман жил болчихоод байхад 50 хувиа авч чадаагүй аж. Ингэж 50 хувиа барагдуулах гэсээр байтал эхнээсээ нас барсан, цус харавсан гээд хохирогчид хорогдсоор байгаа аж. Ер нь, хохирогчдын дийлэнх нь өндөр настан, тэр дундаа эмэгтэйчүүд бий гэнэ. Тиймээс хохирлоо бүрэн барагдуулахыг шаардаж байгаа юм.

Уг нь, хадгаламж зээлийн хоршоодын хөрөнгийг төр битүүмжилж байх үед тухайн үеийн эзэд нь “Бидний хөрөнгийг битүүмжлэх хэрэггүй. Бид хохирлыг барагдуулж чадна” гэж хэлж байсан аж. Гэтэл төр үүнийг үл харгалзан хадгаламж зээлийн  хоршоодын хөрөнгийг битүүмжилсэн ч өнөөг хүртэл хохирлыг 100 хувь барагдуулаагүйн дээр, битүүмжилсэн хөрөнгө нь үнэгүйдэж, үрэгдэж байгааг хохирогчдын төлөөлөл хэлж байв. Тухайлбал, битүүмжилсэн хөрөнгөд анх ашигт малтмалын 14 лиценз байсан ч тавыг нь АМГ-аас төлбөр тооцоо хийгээгүй гэдэг үндэслэлээр хураажээ. Харин есөн лиценз хаачив гэдэг нь тодорхойгүй байна. Түүнчлэн хэд хэдэн, газар, орон сууцыг зах зээлийн болон анхны үнээс хямдаар борлуулсан гэнэ. Засгийн газрын 242 дугаар тогтоолд “Дуудлага худалдааны анхны үнэ нь мөрдөн байцаалтын явцад тогтоосон үнэ байна” гэж заасан ч үүнээс хямдаар борлуулчихаад байгаа гэнэ. Гэтэл загвар, өнгө үзэмж нь гологдсон, мараалын элэгдэлд орсон, дуудлага худалдаанд оруулсан ч борлогдохгүй компьютер зэргийг өндөр үнээр үнэлсэн байдан аж. Энэ нь өнөөгийн зах зээлд бодит үнэлгээ биш гэдэгт Шүүхийн шийдвэр гүйцэтгэх газрынхан болон хохирогчид санал нэгджээ. Тиймээс бодит үнэлгээ хийлгэх зорилгоор Прокурорын байгууллагаас байгуулагдсан ажлын хэсэг ажиллаж эхэлжээ.

Харин үүнд УИХ-ын гишүүн Батж.Батбаяр, “Төр хохирогчдын хохирлыг барагдуулна гэсэн бол барагдуулах л ёстой. Дунд нь бизнес хийсэн хүн байвал хариуцлага хүлээлгэх хэрэгтэй. Харин тухайн үед үнэлгээ хийсэн хүнд хариуцлага ногдуулна гэдэг байж болохгүй зүйл байх. Яагаад гэвэл тэр үед үнэтэй байсан зүйл өнөөдөр үнэгүйдэж болно. Тиймээс тухайн үед нь үүнийг зарж борлуулах ажлыг зохион байгуулж чадаагүй ШШГЕГ-т хариуцлага үүрүүлэх учиртай” гэв.
Харин ШШГЕГ-ынхан Б.Батбаяр гишүүний хэлсэнтэй санал нэгдэхгүй буйгаа хэлсэн. Тухайлбал, шүүхийн шийдвэрийнхэн битүүмжилсэн хөрөнгөөр бизнес хийгээгүй, бараа бүтээгдэхүүнийг албаар зарж борлуулаагүй гэсэн асуудал байхгүй гэдгийг албан ёсоор хэлсэн юм.