Иргэний цахим үнэмлэх хэвлэгдэнэ, хэвлэгдэхгүй, гарна гарахгүй гэсэн яриа хамтарсан Засгийн газар татан буугдсанаас хойш эрчимтэй яригдаж байгаа. УИХ, НИТХ-ын сонгуульд иргэний цахим үнэмлэхийг ашиглана гэж байсан ч талаар өнгөрсөн. Харин одоо Орон нутгийн сонгуулийн хуульд цахим үнэмлэх ашиглана хэмээн сайрхаж л байна. Гэхдээ бүтэх эсэх нь бас л эргэлзээтэй. ХЗДХ-ийн дэд сайд В.Удвал “Орон нутгийн сонгуульд иргэний цахим үнэмлэх ашиглаж чадна” гэж том ам гарав. Харин ХЗДХ-ийн сайд Ц.Нямдорж эсрэг тайлбар хийв. Тэрээр “Одоогийн хэрэглэж байгаа иргэний үнэмлэхийг гурван жилийн турш тарааж байж бүх иргэдээ хамруулж байсан юм шүү. Гэтэл одоо иргэний цахим үнэмлэхийг нэг хоёр сарын дотор тарааж дуусна гэдэг юу л бол” гэж хаширлав. Ийнхүү нэг яамны хоёр сайд иргэний цахим үнэмлэх Орон нутгийн сонгуулийн өмнө тараагдаж дуусах асуудалд зөрүүтэй тайлбар хийв.
