“Монголын төмөр зам” төрийн өмчийн хувьцаат компанийн захирал Б.Батзаяаг өнгөрсөн долоо хоногт ажлаас нь чөлөөлөх шийдвэр гарсан. Тэрээр өнөөдөр үүрэгт ажлаа тус компанийн захирлын үүргийг түр орлон гүйцэтгэх ерөнхий инженертээ хүлээлгэж өгсөн байна. Түүнийг хөдөлмөрийн гэрээ дууссан гэсэн үндэслэлээр үүрэгт ажлаас нь чөлөөлсөн юм. Гэвч энэ нь Төрийн өмчийн хороо холбогдох хууль, дүрэм журмаа зөрчсөн хэрэг юм. Уг нь, Төрийн өмчийн хорооны хурлаар “МТЗ” ТӨХК-ийн захирлын ажлын үр дүнг хэлэлцэж байж хөдөлмөрийн гэрээг сунгах уу, цуцлах уу гэдгийг шийддэг юм байна. Холбогдох байгууллагууд нь Б.Батзаяаг үүрэгт ажлаа хангалттай гүйцэтгэсэн гэж дүгнэсэн. Гэтэл энэ тайланг ТӨХ цаг тухайд нь хэлэлцэлгүй удаа дараа хойшлуулсан байна. Иймээс үндэслэлгүйгээр ажлаас халсан учир ТӨХ-ны шийдвэр хууль хяналтын байгууллагаар шалгагдаж мэдэхээр байгаа аж.