Чингэлтэй дүүргийн шүүх өнөөдөр “Эрдэнэ Суварга” компанийн нягтлан Д.Энхмандахад холбогдох хэргийг хэлэлцэх байсан боловч өмгөөлөгч ирээгүй шалтгаанаар шүүх хурлыг хойшлуулав. Тэрээр “Эрдэнэ Суварга” компанид нягтлангаар ажиллаж байхдаа тус компанийн захирал Б.Сувдаагийн гарын үсгийг хуурамчаар зурж, ХААН банкнаас 30 сая төгрөг зээлсэн, мөн захирлаа залилж 15 сая төгрөгөөр үнэлэгдэх машиныг нь зарсан хэрэгт буруутгагдаад байгаа юм.
 Д.Энхмандах “Би энэ хэрэгт ямар ч буруугүй. Намайг “Эрдэнэ Суварга” компанийг үүсгэн байгуулсан Д.Бат-Эрдэнэ гэр бүлийн маргаанаас болж гэмт хэрэгт гүтгэж байна” хэмээн олонд мэдээлсэн удаатай. Түүнчлэн тэрээр УИХ-ын гишүүн Д.Очирбат, Ц.Батбаяр, НИТХ-ын тэргүүлэгч Д.Бат-Эрдэнэ, Чингэлтэй дүүргийн Засаг дарга Д.Ганболд нарын авлигын хэргийн тухай мэдээллийг дэлгэж, АТГ-аар шалгуулсан юм.  
Улсын яллагч Д.Энхмандахад бусдын өмч хөрөнгийг залилж, онц их хэмжээний хохирол учруулсан хэмээн яллах дүгнэлт үйлдээд байгаа аж. Түүнд холбогдох шүүх хурлыг ирэх сарын 5-нд хийхээр товложээ.