Сонгууль ойртох тусам хуралдаа оролцох гишүүдийн тоо цөөрсөөр. Хууль батлах, бодлого боловсруулах үндсэн үүргээ умартсан гишүүд УИХ-ын дарга, цагтаа цугласан ангийнхнаа чилтэл нь хүлээлгэх боллоо. Ирц бүрдээгүйгээс Байнгын хорооны хуралдаан эхлэлгүй цаг гаруй болох ч энүүхэнд болжээ. Уриад, залаад дуудаад ч хуралдаа ирдэггүй гишүүдийг хэвлэлийнхэн, сонгогчид анхааралдаа авбал зохино гэж ангийн дарга нь арга ядан анхааруулдаг. Чуулганы завсарлах хугацаа ойртож, шийдвэрлэх чухал асуудал шил шилээ даран хүлээж байхад зарим гишүүн хэл сураггүй хурлаа таслаад явчихав. Өнөөдрийн нэгдсэн хуралдаанд 43 гишүүн “оролцжээ”. Чуулганы ирцийн хувь 56.5 гэж байсан ч хуралдаанд 16 гишүүн хоцорч ирсэн юм. Гишүүдийг ирэхээр хүлээсээр 11 цагийн үед ирц 50 хувьдаа хүрч бүрдэж хуралдаан эхлэв. Нийт гурван цаг үргэлжилсэн хуралдаанаас дээрх 16 гишүүн нэлээд хугацааг хумсалсан нь мэдээж. Хоцорсон цаг нь хамгийн багадаа 30 минут бол хамгийн дээд тал нь 2 цаг 40 минутаар хоцорсон байх аж. Бараг 10-20 минут хуралд оролцсон болоод гарсан эрхэм гишүүдийг хуралдаанд суусан гэж тооцох уу. Эсвэл…
Хуралдааныг 16 гишүүн ор тас тасалсан байна. Хуралдаа сууж, хууль батлахгүй юм бол УИХ-д сонгогдоод ч яах юм билээ.