“Анод”-ын, бас бага насны хүүхдийг... гээд олон гэмт хэрэгт сэжиглэгдэж буй Мон-Ураны Б.Наранхүү УИХ-д сууж “халдашгүй эрх”-тэй болохоор зүтгэж байгаа тухай эх сурвалжууд мэдээлж байсан.

Б.Наранхүү МАН-аас нэр дэвшихээр нэлээд үзсэн боловч У.Хүрэлсүх нар намын нэр хүндээ бодон татгалзсан хариу өгсөн гэдэг.
Мань эр нэг хэсэг бие даан нэр дэвшихээр зүтгэсэн. 800 хүний гарын үсэг зуруулж байна хэмээн хэсэг явснаа бас л больжээ.

Тэрээр АН-аас нэр дэвшихээр зүтгэж эхэлсэн байна. Дундговь аймгийн АН-ын хорооны хурал өнөөдөр болж байгаа бөгөөд Б.Наранхүү энэ хурал дээр намын гишүүн, ҮЗХ-ны гишүүн болон улмаар нэр дэвшүүлэх шийдийг гаргуулахаар төлөвлөж байгаа аж.

Уг нь энэ аймагт “Дундговь-Газар шороо” хөдөлгөөний тэргүүн Б.Мөнхболор нэр дэвшихээр ажиллаж байсан. Өнгөрсөн жилүүдэд аймагтаа ажиллан, хөдөлгөөн байгуулж, газар нутгийнхаа  төлөө тэмцэхийн зэрэгцээ аймаг орон нутаг, иргэдийн төлөө чамгүй зүйлийг амжуулсан хэмээн нутгийнхан ам сайтай байдаг. Тиймээс ч АН-ын удирдлагууд болон Дундговь аймгийн АН-ын хорооныхон дэмжихээ илэрхийлээд байжээ.

Харин нэр дэвших эсэхийг эцэслэн шийдвэрлэх хурлын өмнөхөн Мон-Ураны Б.Наранхүү нэр дэвшинэ хэмээн Дундговийн АН-ынхныг бужигнуулж эхэлсэн аж. Намын хорооны хурал өнөөдөр 14.00 цагт эхлэх бөгөөд уг хуралд оролцож Б.Нарахүүг дэмжинэ хэмээн зарим фракцийн тэргүүн, УИХ-ын гишүүн эрхмүүд очсон гэнэ. Харин намын дарга Н.Алтанхуяг энэ асуудалд тааламжтай хандахгүй гэдгээ илэрхийлжээ.

Б.Наранхүүгийн хувьд УИХ-д сууж хамгаалалтад орохгүй бол газрын, Анодын гээд олон хэрэг нь сөхөгдөж, “аав”-ын хаалга татах магадлал өндөр. Түүнээс гадна  шүүх, прокурор гээд хуулийн бүхий л эрх мэдэл өнөөдөр АН-ын мэдэлд буй. Б.Наранхүүгийн АН-ыг сонгож зүтгээд байгаагийн товч утга нь энэ гэнэ. Мөнгө гэдэг агуу хүчтэй ажээ.

Эх сурвалж: www.zaluu.com