АНУ-д Тираннозавр Батаар хэмээх аварга үлэг гүрвэлийн араг ясыг дуудлага худалдаанд оруулахаар болсныг манай улс эсэргүүцэж буйгаа илэрхийлсэн. Учир нь, уг нэн ховор олдворыг Монголын нутгаас олдсон хэмээн үзэж байгаа. Хэрэв Монголын газар нутгаас олдсон нь тогтоогдвол Монгол Улсын Ерөнхийлөгч өөрөө Олон улсын шүүхэд нэхэмжлэл гаргана гэдгээ мэдэгдсэн гэнэ.
Тиймээс Цагдаагийн ерөнхий газрын дарга Д.Сандаг-Очир өчигдөр тушаал гаргаж, үлэг гүрвэлийн олдвор манай орноос алдагдсан эсэх, хууль бусаар хил дамнан худалдагдсан эсэхийг  шалгаж тогтоолгохоор Эрүүгийн цагдаагийн газрын ажилтнуудаас бүрдсэн ажлын хэсгийг томиллоо. Тус газрын ажилтнууд одоогоос хоёр жилийн өмнө манай улсын иргэн У үлэг гүрвэлийн чулуужсан өндөг хоёр ширхгийг зарах гэж байхад нь илрүүлэн Палентологийн хүрээлэнд шилжүүлжээ. Мөн 2009 онд Польш улсын иргэн Ч манай улсаас ОХУ-ын хилээр үлэг гүрвэлийн яс, чулуужсан өндөг гаргах гэж байгаад баригдсан байна.