“Ардын засаг-Ард түмэнтэйгээ хамт” аяны хүрээнд Хууль зүй, дотоод хэргийн яам болон харьяа агентлаг, байгууллагаас хамтран өнөөдөр Сүхбаатарын талбай дээр нээлттэй өдөрлөг зохион байгуулна. 13.00-17.00 цагийн хооронд үргэлжлэх уг өдөрлөгийн үеэр иргэдэд төрийн зарим үйлчилгээг шууд үзүүлэх юм байна. Тухайлбал, хууль зүйн зөвлөгөө өгөх, хуульчийн сонгон шалгаруулалтын талаар мэдээлэл өгөхийн зэрэгцээ өмгөөлөл, нотариатын талаар мэдээлэл өгч, үнэгүй нотариатын үйлчилгээ ч үзүүлэх ажээ.
Хууль зүй, дотоод хэргийн яамны харьяа агентлаг бүр өөрийн чиглэлээр өргөдөл гомдол хүлээж авах бөгөөд архивын лавлагаа гаргаж өгөх, гадаад паспортын материал хүлээж авах, сунгах, лавлагаа өгөх, хорих ангид ял эдэлж буй хоригдлуудын ар гэрийнхнийг утсаар холбоо бариулах гээд олон ажил хийхээр төлөвлөжээ. Мөн харьяа дүүргийнхээ бүртгэлийн газарт эд хөрөнгийн лавлагаа авахаар тодорхой хугацаанд хандсан иргэдэд лавлагааных нь хариуг нээлттэй өдөрлөгийн үеэр олгох юм байна.