Өнөөдөр 12.00 цагт Япон Улсын Элчин сайдын өргөөнд Монгол Улсын иргэн Санжийн Дэмбэрэлд Япон усын Эзэн хааны “Мандах нар” одонгийн “Сарнай цэцэг бүхий Алтан туяа” зэрэглэлийн одон гардуулах ёслолын ажиллагаа боллоо.

С.Дэмбэрэл нь их хичээл зүтгэлийн үр дүнд эзэмшсэн япон хэлний мэдлэгээ ашиглан, 15 жил хагасын хугацаанд Японы Элчин сайдын яаманд ажиллаж, ардчиллын дараахь хоёр орны харилцааг хөгжүүлэхэд их хувь нэмрээ оруулжээ.

Гавьяаныхаа амралтад гарсныхаа дараа ч Хүмүүнлэгийн ухааны их сургууль зэрэгт Япон хэлийг зааж судалгаа хийхээс гадна өөрийн судлгааны үр шим болох болох “Япон монгол тольч бичиг”-ийг эмхэтгэн гаргасан билээ. Мөн Монгол-Японы харилцааг дэмжих “Түншийн холбоо” нийгэмлэг зэрэг найрамдлын нийгэмлэгүүдийн удирдах ажилтнаар ажиллаж, хоёр орны хоорондох хүн солилцооны арга хэмжээг өнөөг хүртэл идэвхтэй явуулсаар ирсэн.

Энэ мэт өргөн хүрээний үйл ажиллагаагаар дамжуулан Япон, Монголын найрамдалт харилцааг өргөжүүлэн хөгжүүлэхэд үнэтэй хувь нэмэр оруулсан С.Дэмбэрэлийн хичээл зүтгэлийг өндрөөр үнэлж энэхүү одонг олгожээ.