Улсын Дээд шүүхийнхэн амралтын өдөр буюу тавдугаар сарын 26, 27-нд ажиллаж, 10:00-17:00 цагийн хооронд нэр дэвшигчдээс мэдүүлэг авах гэнэ. Учир нь, сонгуульд нэр дэвшигч нь Сонгуулийн тухай хуулийн 26.4.1 дэх хэсэгт заасан шаардлагыг хангасан талаар тодорхойлолтыг Улсын Дээд шүүх мөн хуулийн 29,6 дахь хэсэгт заасны дагуу нэр дэвшигч тус бүрээр гаргаж байна.
Уг хуулийн 26.4.1 дэх хэсэгт “нэр дэвшигч нь банк, бусад хуулийн этгээд, иргэн шүүхийн шийдвэрээр тогтоогдсон төлбөл зохих зээл, барьцаа, батлан даалтын өр болон хугацаа хэтэрсэн албан татварын өр төлбөргүй байна” гэжээ. Харин 29.6-д “Энэ хуулийн 29.2.4-т заасан тодорхойлолтыг Улсын дээд шүүх, энэ хуулийн 29.2.5-д заасан тодорхойлолтыг цагдаагийн төв байгууллага нэр дэвшигч тус бүрээр гаргаж, Сонгуулийн ерөнхий хороо болон тойргийн хороонд сонгууль товлон зарласан өдрөөс хойш 35 хоногийн дотор албан бичгээр хүргүүлнэ” гэж заасан байгаа юм.