Төрийн үйлчилгээний хүртээмжийг нэмэг­дүүлж, сайжруулах зорил­готой “Нэг цонхны үйлчилгээ” өнөөдрийн байдлаар улсын хэмжээнд 21 аймгийн төв, дөрвөн сум, есөн дүүрэг, гурван хороонд нийт 38 цэгт ажиллаж байна. Архангай аймгийн хувьд Засгийн газрын “Нэг цонхны үйлчилгээний талаар авах зарим арга хэмжээ”-ний тухай тогтоолыг улсын хэмжээнд үлгэр жишээ хэрэгжүүлэх зорилгоор “Бодит ажил, бодит үр дүн”-гийн жилийн ажлын хүрээнд 12 суманд “Нэг цонхны үйлчилгээ”-г нэвтрүүлээд байлаа. Харин өнгөрсөн долоо хоногт аймаг хөгжүүлэх сангийн эх үүсвэрээр иж бүрэн засвар тохижилтын ажлыг дуусган аймгийн төвдөө дээрх үйлчилгээг нээлээ. Ингэснээр “Нэг цонхны үйлчилгээ”-р иргэд хөдөлмөрийн, эд хөрөнгийн эрхийн бүртгэл, нийгмийн халамж, даатгал, газрын харилцаа, иргэний болон хуулийн этгээдийн бүртгэл, жижиг, дунд үйлдвэрлэлийг дэмжих үйлчилгээ, өргөдөл, гомдол, СӨХ болон Эрдэнбулган сумын II ба III багийн Засаг даргын үйлчилгээг авах боломжтой болж байгаа юм байна.