УИХ-ын сонгуульд нэр дэвшигчид албан ёсоор тодорч дууслаа. Тиймээс тэд сурталчилгаа хэмээх тархи угаах ажилдаа ханцуй шамлан орцгоов. Тун удахгүй Сонгуулийн ерөнхий хорооноос нэр дэвшигчдийн сурталчилгааны эрхийг нээхээр ч бүр галзуурах янзтай. Сонгууль дөхөхөөр элдэв хэрүүл, гүтгэлэг газар авч телевизээр үзэх зүйлгүй болдог жамтай. Энэ жилийн сонгуулийн сурталчилгаа ч нэлээд олон хүнийг залхаах бололтой. Амралтын өдрүүдээр гарч буй нэвтрүүлгүүдийн оролцогч нь мэдээж нэр дэвшигчид байлаа. Сайхан сайхан мөрөөдлөө дэлгэж, нэг л их ухаантай яриа дэлгэх нэр дэвшигчид телевиз бүрийн хоймор эзлэх болов. Урьд өмнө зүсийг нь ч харж байгаагүй хүмүүс болоод сүүлийн хэдэн жил таг дуугүй явсан хүмүүс гэнэт хэлд орж, философи яриад л телевизүүдийн эфирийн ихэх цагийг эзэлж байна. Телевизийн олон ангит монгол кинонууд нь хүртэл нэг л улс төржилт. Үзэж болох ганц зүйл хүүхдэд зориулсан нэвтрүүлэг л болж байх шиг. Өмнөх сонгуулиар нэр дэвшигчид хүүхдийн нэвтрүүлэгт хүртэл зочноор оролцож байсан түүх бий. Тэгэхээр удахгүй телевизийн сувгуудаар улстөрчдийн нүүр царайг залхтлаа харах нь. Ядахад кабелийн сувгаар гарч буй телевизүүдийн олныг яана. Нэг сарын турш үзэх харах юмгүй уйдах нь дээ.